1. Timoteus 5

₁Ale bealkkit boares olbmá, muhto rávve su dego iežat áhči, nuorra olbmáid dego iežat vieljaid, ₂boares nissoniid dego iežat eatni, nuorra nissoniid dego iežat oappáid, buot buhtisvuođas.

₃Gudnejahte ja doarjjo leaskanissoniid geain duođaid ii leat fuolaheaddji. ₄Muhto jos guđege leaskanissonis leat mánát dahje áhkkubat, de sii galget vuos oahppat deavdit geatnegasvuođaset iežaset bearrašii ja buhttet vánhemiiddiset váivviid, danne go dat lea dohkálaš Ipmilii.

₅Leaskanisson gii lea báhcán áibbas okto, bidjá doaivvu Ipmilii ja rohkadallá ja čuorvu Ipmila heaittekeahttá ija beaivvi. ₆Muhto dat gii dáhttu eallit badjelmearálašvuođas, lea eallinaga jápmán. ₇Muittut dies leaskkaid, vai sii ellet láitemeahttumit. ₈Jos muhtun ii ane fuola iežas fulkkiin ja erenoamážit iežas bearašlahtuin, son lea biehttalan oskku ja lea vearrát go eahpeoskkolaš.

₉Leaskkaid logahallamii dohkke dušše nisson gii lea deavdán guhttalogi jagi ja gii lea leamaš dušše ovtta boatnjá áhkká. ₁₀Son ferte leat dovddus iežas buriin daguin, das ahte lea dikšon mánáid, leamaš árvvas, bassan bassi olbmuid julggiid, veahkehan heađálaččaid ja áŋgiruššan dahkat buotlágán buriid. ₁₁Muhto nuorra leaskkaid ale váldde logahallamii. Go sin anistumit buollájit, de sii gáidet Kristusis ja dáhttot náitalit. ₁₂Sii šaddet dubmejuvvot, danin go sii leat rihkkon vuosttaš oskkáldasvuođalohpádusaset. ₁₃Dasa lassin sii hárjánit joavdelastit ja viehkat viessogaskkaid, eaige dušše dan, muhto maiddái solžat, seahkánit áššiide mat eai sidjiide gula ja hállat heivemeahttumiid. ₁₄Dan dihte mun dáhtun ahte nuorra leaskkat náitalit, riegádahttet mánáid ja dikšot ruovttuset, vai eai atte min vuostálastiide maidge sálvvaid bilkidit. ₁₅Muhtumat leat juo jorgalan čuovvut Sáhtána. ₁₆Jos muhtun oskkolaš nissonis leat ruovttustis leaskkat, de son galgá atnit sis fuola iige bidjat sin searvegotti noađđin, vai searvegoddi nagoda atnit fuola dain leaskkain geat leat báhcán okto.

₁₇Vuorrasat geat jođihit searvegotti bures, ánssášit guovttegeardásaš gudni, erenoamážit dat geat sárdnidit ja oahpahit. ₁₈Čálahan cealká: Ale čana vuovssá njálmmi go dat lea luvvemin gortni ja: Bargi lea ánssášan iežas bálkká. ₁₉Ale váldde vuhtii váidalusaid searvegottivuorrasa vuostá muđui go leat guokte dahje golbma duođašteaddji. ₂₀Cuiggot buohkaid gullut daid geat suddudit, vai maiddái earrásat ballet. ₂₁Ipmila, Kristus Jesusa ja válljejuvvon eŋgeliid ovddas mun ávžžun du álo heivehit dáid rávvagiid bealátkeahttájit ja almma geahčakeahttá olbmuid hápmái. ₂₂Ale menddo geargadit bija gieđaid geange ala amat šaddat oasálažžan eará olbmuid suttuide. Ane iežat buhtisin.

₂₃Ale šat juga dušše čázi, muhto návddaš veahá viinni čoavjját ja dávjjes buozalvasaidat dihte.

₂₄Muhtun olbmuid suttut leat albmosat ja ožžot duomu ovdal, earrásiid suttut easkka maŋŋil. ₂₅Seammá láhkái buorit dagutge leat albmosat, ja dat mat eai leat buorit, eai sáhte čihkkojuvvot.