1. Muitalusaid girji 20

₁Jagi geažes, dan áigge go gonagasat lávejedje vuolgit soahtat, Joab vulggii soahteveagainis stajidit ammonlaččaid eatnama ja birastahtii Rabba. David ieš bázii Jerusalemii, muhto Joab válddii Rabba ja duššadii dan.

₂David válddii ammonlaččaid gonagasa oaivvis gollekruvnnu. Dat lei gollis ja dettii ovtta taleantta, ja das lei mávssolaš geađgi. Dál dat šattai Davida oaivái. Son doalvvui gávpogis hui ollu sállaša. ₃Gávpoga ássiid son bággii vuolgit eret ja bargat saháiguin, ruovdeguhkiiguin ja ákšuiguin. Ná David dagai buot ammonlaččaid gávpogiidda. De son máhcai Jerusalemii oppa soahteveagain.

₄Muhtin áiggi geažes šattai Geseris filistalaččaiguin soahti mas hušalaš Sibbekai gottii rafalaš Sippaja, ja filistalaččat vuoliduvvojedje. ₅De šattai fas soahti filistalaččaiguin, ja Elhanan, Jaira bárdni, gottii Lahmi, gatlaš Goljata vielja, gean sáitenađđa lei gassat nugo gođabumme. ₆Fastain lei soahti Gatis. Doppe lei hui stuorra olmmái geas ledje goappáge gieđas guhtta suorpma ja goappáge juolggis guhtta juolgesuorpma, oktiibuot guokteloginjeallje; sonnai lea Rafa nális. ₇Son hiddjidii Israela, muhto Jonatan, Davida vielja Šima bárdni, gottii su. ₈Nu gatlaš Rafa náli olbmot gottáhalle Davidii ja su olbmáide.