1. Muitalusaid girji 11

₁Buot israellaččat čoahkkanedje Davida lusa Hebronii ja dadje: “Mii leat du oažži ja varra. ₂Juo ovdal, dalle go Saul ain lei gonagas, de don jođihit Israela dan soahtemohkiin. Hearrá, du Ipmil, lea cealkán dutnje: ‘Don geahčat mu álbmoga Israela, don šattat mu álbmoga Israela ráđđejeaddjin.’” ₃Maiddái buot Israela vuorrasat bohte gonagasa lusa Hebronii. Doppe David dagai singuin lihtu Hearrá muođuid ovddas, ja sii vuide Davida Israela gonagassan, nugo Hearrá lei gohččon Samuela sárdnut.

₄David ja israellaččat vulge Jerusalemii dahjege Jebusii gos jebuslaččat dalle ásse. ₅Jebusa olbmot dadje Davidii: “Deike don it boađe!” Muhto David válddii Siona ladni mii dasto šattai Davida gávpogin. ₆David lei dadjan: “Dat gii vuosttažin goddá jebuslačča, šaddá bajimus oaivámužžan.” Ladnái beasai ovddemus Joab, Seruja bárdni, ja son šattai soahteveagaoaivámužžan.

₇David ásai ladnái, ja dan dihte dat gohčoduvvui Davida gávpogin. ₈Son nannii gávpoga muvrrain Millos ovddos, ja Joab huksii ođđasis gávpoga eará osiid. ₉David šattai fámoleabbon ahte fámoleabbon, ja Hearrá, Almmiveagaid Ipmil, lei suinna.

₁₀Dát ledje Davida válljosoahteolbmát geat oppa Israeliin dorjo nannosit su gonagasvuođa ja dahke su Israela gonagassan dan Hearrá sáni mielde maid son lei sárdnon Israela birra. ₁₁Dát lea Davida soahtesáŋgáriid logahallan:

Hakmonlaš Jišbaal lei vuosttaš golmma stuorimus soahteolbmás. Son bajidii sáittis golmmačuođi vašálačča badjel geat gottáhalle ovttat gearddis. ₁₂Dasto lei ahoahlaš Elasar, Dodo bárdni, gii maid lei okta dan golmma stuorimus soahteolbmás. ₁₃Son lei Davida mielde Pas Dammimis, gosa filistalaččat ledje čoagganan soahtanmohkis. Doppe lei bealdu mas šattai valjis bivgi. Go israellaččat báhtaredje filistalaččain, ₁₄de Elasar čuoččastii guovdu bealddu, bealuštii dan ja časkkii filistalaččaid. Nu Hearrá attii stuorra vuoittu.

₁₅Oktii golmmas dan golmmalogi oaivámuččas vulge Davida lusa Adullama bákteráigái. Filistalaččaid soahteveagas lei dalle siida Refaimleagis. ₁₆David lei dalle várreladnis, ja filistalaččaid njunušveahka lei Betlehemis. ₁₇David goikkai sakka ja dajai: “Vare muhtun vieččašii munnje čázi dan arvegáivvos mii lea Betlehema gávpotpoartta guoras!” ₁₈Dalle duot golmmas bahkkejedje filistalaččaid soahtesiidii, goivo čázi Betlehema gávpotpoartta gáivvos ja bukte Davidii. David ii goit dáhtton juhkat, muhto golggahii dan juhkamušoaffarin Hearrái. ₁₉Son dajai: “Ipmil várjalehkos mu juhkamis dán! Jugašingo mun daid olbmáid vara geat vižže dan heakkaset váttuin?” Iige son dáhtton juhkat dan. Dakkár daguid dahke duot golbma soahteolbmá.

₂₀Abišai, Joaba viellja, lei dan golbmalohkása oaivámuš. Son bajidii sáittis golmmačuođi gottáhallan olbmá badjel, muhto ii lohkkojuvvon dan golmma stuorimus soahteolbmá searvái. ₂₁Dan golbmalohkása gaskkas son lei beakkálmas. Son lei sin oaivámuš, muhto ii lean dan golmma stuorimus soahteolbmá veardásaš. ₂₂Kabseellaš Benaja, Jojada bárdni, lei jálus olmmái ja dagai stuorra daguid. Son časkkii jámas moablaš Ariela guokte bártni. Muhtun borgabeaivvi son njiejai arvegáivui ja gottii doppe ledjona. ₂₃Son časkkii jámas maiddái stuorra egyptalaš olbmá, viđa állana guhkkosačča. Egyptalaččas lei gieđas sáiti mii lei gassat nugo gođabumme. Muhto Benaja fallehii egyptalačča soabbi gieđas, gaikkihii sus sáitti ja gottii su dainna. ₂₄Dakkár daguid dagai Benaja, Jojada bárdni, ja son adnojuvvui árvvus dan golmmalogi soahteolbmá gaskkas. ₂₅Son lei beakkálmasamus dan golbmalohkásis, muhto ii lean dan golbmasa veardásaš. David bijai su heaggafávttaidis oaivámužžan.

₂₆Eará jálus soahteolbmát ledje Asael, Joaba viellja, Elhanan, betlehemlaš Dodo bárdni, ₂₇harodlaš Šammot, peletlaš Heles, ₂₈tekoalaš Ira, Ikkeša bárdni, anatotlaš Abieser, ₂₉hušailaš Sibbekai, ahoahlaš Ilai, ₃₀netofalaš Mahrai, netofalaš Heled, Baana bárdni, ₃₁Itai, Ribaja bárdni, benjaminlaččaid Gibea olmmoš, piratonlaš Benaja, ₃₂Hurai, Nahale Gaaša olmmoš, arabalaš Abiel, ₃₃bahurimlaš Asmavet, šaalbonlaš Eljahba, ₃₄gisonlaš Hašem, hararlaš Jonatan, Šage bárdni, ₃₅hararlaš Ahiam, Sakara bárdni, Elifal, Ura bárdni, ₃₆mekeralaš Hefer, gilolaš Ahia, ₃₇karmellaš Hesro, Naarai, Esbaja bárdni, ₃₈Joel, Natana viellja, Mibhar, Hagri bárdni, ₃₉ammonlaš Selek, beerotlaš Nahrai gii lei Joaba, Seruja bártni, vearjoguoddi, ₄₀jeterlaš Ira, jeterlaš Gareb, ₄₁hetlaš Uria, Sabad, Ahlaja bárdni, ₄₂rubenlaš Adina, Šisa bárdni, Rubena soga oaivámuš gii jođihii golbmalogi olbmá, ₄₃Hanan, Maaka bárdni, metenlaš Jošafat, ₄₄aštarotlaš Ussia, aroerlaš Hotama bártnit Šama ja Jeiel, ₄₅Jediael, Šimri bárdni, ja su viellja, tislaš Joha, ₄₆mahanajimlaš Eliel, Elnaama bártnit Jeribai ja Jošavja, moablaš Jitma ₄₇ja vel Eliel, Obed ja sobalaš Jaasiel.