Matteus 13

₁Siämmáá peeivi Jeesus vuolgij olgos, moonâi jäävri riidon já čokánij. ₂Suu pirrâ čokkânii talle nuuvt ennuv ulmuuh, et sun ferttij moonnâđ kárbás. Sun čokkái kárbást já aalmug čuážui riddoost, ₃já sun sáárnui sijjân kuhháá viärdádâsâiguin.

Sun eeđâi: »Almai vuolgij kalveđ. ₄Já ko sun koolvij, te uási siemânijn koočâi luoddâpiällás, já lodeh pottii já purrii jiivijd. ₅Uási koočâi källeesajan, mast jivvijd ij lamaš ennustkin eennâm. Toh ittii kale jotelávt, tastko eennâm ij lam kieŋŋâl, ₆mut ko piäiváš pajanij, te iđoh kuškii pakkâsist, tastko tain iä lamaš ruottâseh. ₇Uási vuod koočâi čuággooraasij kooskân, já čuággoorääsih šoddii já kuáridii iđoid. ₈Mut uási jiivijn koočâi šiev enâmân já adelij šado, mii čyeti, mii kutlov, mii kulmâlov jivveed. ₉Kiäst laa peeljih, tot kulos.»

₁₀Máttááttâspárnááh pottii Jeesus kuuvl já koijâdii: »Mondiet tun sáárnuh sijjân viärdádâsâiguin?»

₁₁Jeesus västidij:

»Tondiet, ko tij leppeđ uážžum uápásmuđ oolmij väldikode syeligâsvuođáid, mut sij iä. ₁₂Kiäst lii, toos adeluvvoo, já sun uážžu valjeeht, mut kiäst ij lah, tast váldoo meddâl tot-uv, mii sust lii. ₁₃Mun sáárnum sijjân viärdádâsâiguin, tastko sij uáinih iäge kuittâg uáini já kuleh iäge kuittâg kuulâ iäge ibbeerd. ₁₄Sist olášuvá taat Jesaja ennustâs:

₁₆»Avdâgâsah láá tii čalmeh, tastko toh uáinih, já tii peeljih, tastko toh kuleh! ₁₇Tuođâi: maaŋgah profeteh já vanhurskáh láá aibâšâm uáiniđ tom, maid tij uáinivetteđ, iäge sij lah uáinám, já kuullâđ tom, maid tij kulâvetteđ, iäge sij lah kuullâm.

₁₈»Kuullâđ tääl, maid viärdádâs kalvest meerhâš. ₁₉Ain ko kiinii kulá saavâ väldikoddeest ige ibbeerd tom, puátá Pahakkâs já kiškeet meddâl tom, mii suu vááimun lii kolvum. Taam meerhâš luoddâpiällás kolvum siemâ. ₂₀Koolvâ källee oolâ kovvee tom, kote saavâ kulâdijnis tállân váldá tom iloin vuástá ₂₁mut killáá tuš mottoom ääigi, tastko sust váiluh ruottâseh. Ko puátá atâštâs teikâ váinu sääni tiet, te sun luápá jotelávt. ₂₂Koolvâ čuággooraasij kooskân meerhâš ulmuu, kote kulá sääni mut kiäst sääni ij šoddâd šado, tastko taan maailm huolah já rigesvuođâ viettâlâs avkkâdeh tom. ₂₃Mut koolvâ šiev enâmân kovvee ulmuu, kote kulá sääni já ibbeerd tom. Taah ulmuuh šoddâdeh šado: kii čyeti, kii kutlov, kii kulmâlov jivveed.»

₂₄Jeesus sáárnui sijjân nube viärdádâs oolmij väldikoddeest: »Almai koolvij piäldusis šiev siemmân. ₂₅Mut puohâi uáđidijn suu vajalâš poođij, koolvij niisui juávkun ilâskijd já moonâi meddâl. ₂₆Ko šaddo šodâškuođij já rähtiškuođij jiveuáivi, te ilâskeh-uv ittii. ₂₇Pargeeh monnii talle išedis kuuvl já ettii sunjin: ’Hiärrá, jieh-uv tun kalvam piäldusâd šiev siemmân? Kost toos láá ittáám ilâskeh?’ ₂₈Iššeed eeđâi sijjân: ’Tot lii muu vajalii pargo.’ Te almaah koijâdii sust: ’Táátuh-uv, et mij moonnâp já kiškop taid meddâl?’ ₂₉’Jiem’, sun västidij, ’tij sättivetteđ ilâskijd nurâdijn kiškođ niisu-uv. ₃₀Tipteđ taid šoddâđ oovtâst nijttem räi. Ko ton äigi puátá, mun eeđâm nijtteid: Nuurrâđ vistig ilâskijd já čoonnâđ taid kiästoid puáldim várás. Mut niisu čokkiđ muu ááitán.’»

₃₁Jeesus sáárnui sijjân meid tággáár viärdádâs: »Oolmij väldikodde lii tego siinapsiemâ, mon almai koolvij eennâmsis. ₃₂Tot lii ucemus puoh siemânijn, mut ko tot šadda olesin, te tot lii muorâkäärdi šaddoin stuárráámus. Viijmâg tot lii tego muorâ, nuuvt et alme lodeh puátih já rähtih piervâlis ton ovssijd.»

₃₃Vala sun sáárnui sijjân viärdádâs: »Oolmij väldikodde lii suvre sullâsâš. Ko nissoon sehhij tom kuulmâ miiton jáávuid, te ubâ täigi suvroi.»

₃₄Puoh taam Jeesus sáárnui aalmugjuávkun viärdádâsâiguin. Viärdádâsâittáá sun ij sárnum sijjân maiden, ₃₅vâi taat proofeet sääni olášuuččij:

₃₆Talle Jeesus vuolgâttij olmoošjuávhu meddâl já moonâi siisâ. Máttááttâspárnááh pottii suu kuuvl já ettii: »Čielgii mijjân viärdádâs piäldu ilâskijn.» ₃₇Sun västidij sijjân:

»Almai, kote koolvij šiev siemmân, lii Ulmuu Alge. ₃₈Piäldu lii maailm. Šiev siemâ meerhâš taid, kiäh kuleh oolmij väldikoodán, ilâskeh taid, kiäh láá Pahakkâs vääldi vyelni. ₃₉Vajalâš, kote koolvij iilâsk, lii Sáttán, nijttemäigi lii maailmloppâ, já nijtteeh láá eŋgâleh. ₄₀Tego iilâsk čuákkejuvvoo já hevâttuvvoo puáldimáin, nuuvt tábáhtuvá maailm loopâst. ₄₁Ulmuu Alge vuolgât eŋgâlijdis, já sij čuákkejeh suu väldikoddeest puohâid, kiäh viettâleh paavuotân já taheh verivuođâ. ₄₂Eŋgâleh leggisteh sii häitis omânân, já tobbeen lii čiärrum já paanij kiccâm. ₄₃Mut Immeel uámih čyevih talle Eejis väldikoddeest tego piäiváš. Kiäst laa peeljih, tot kulos!

₄₄»Oolmij väldikodde lii tego piäldun čiehhum aarni. Ko almai kaavnâi tom, sun čievâi tom uđđâsist enâmân, já talle sun ilosmij já vuobdij puoh, maid sun omâstij já oostij tom piäldu.

₄₅»Oolmij väldikodde lii meiddei tággáár. Kävppijâs uusâi mučis kässeekeeđgijd. ₄₆Ko sun kaavnâi oovtâ tivrâs kässeekeeđgi, te sun vuobdij puoh maid omâstij já oostij tom.

₄₇»Vala oolmij väldikodde lii tego nyetti, mii suoppui jáávrán já mii piivdij puohlágán kuolijd. ₄₈Ko tot tievâi, te kuálásteijeeh kessii tom riidon, čokánii já nurrii šiev kuolijd littijd mut leggistii kiälbuttes kuolijd meddâl. ₄₉Näävt kiävá maailm loopâst: eŋgâleh puátih, iärutteh paaid vanhurskáin ₅₀já leggisteh sii häitis omânân. Tobbeen lii čiärrum já paanij kiccâm.»

₅₁»Ibbeerdvetteđ-uv tij tääl puoh taam?» Jeesus koijâdij. »Kale iberdep», sii västidii. ₅₂Talle sun eeđâi sijjân: »Tondietpa jyehi laavâmáttáátteijee, kiäst lii šoddâm oolmij väldikode máttááttâspärni, lii tego táluiššeed, kote vuárhás valjevuođâst puáhtá oovdân uđđâs já puárrás.»

₅₃Ko Jeesus lâi muštâlâm puoh täid viärdádâsâid, sun vuolgij ton kuávlust ₅₄já moonâi kuátukaavpugsis. Sun máttááttij ulmuid sii synagogast, já sij hiämáskii já koijâdii: »Maht sust lii taat vijsesvuotâ já kost vyeimi toohâđ imâštavoid? ₅₅Ij-uv sun lah tot huksejeijee alge? Ij-uv suu eeni nommâ lah Máárjá, já lááhân Jáákkup, Joovsep, Simmoon já Juudas suu viiljah? ₅₆Suu uábih-uv ääsih puohah tääbbin kost mij-uv. Kost sun lii uážžum puoh taam?» ₅₇Näävt sij tuostuu suu.

Jeesus eeđâi sijjân: »Kosten ij lah proofeet nuuvt ucášum ko kuátukaavpugstis já jieijâs pääihist.» ₅₈Já ko sij iä oskom sunjin, sun ij porgâm tobbeen maŋgâgin vyeimitavo.