Johannes 18

₁Ko Jeesus lâi ettâm taam, sun vuolgij máttááttâspárnáidiskuin Kidronjuvvii nubebel. Tobbeen lâi muorâkärdi, já Jeesus já máttááttâspárnááh monnii tohon. ₂Meiddei Juudas, suu kävildeijee, tuubdâi saje, tastko Jeesus lâi maŋgii lamaš tobbeen máttááttâspárnáidiskuin. ₃Nuuvtpa Juudas vaaldij fáárun suáldátuásáduv sehe ollâpaapâi já fariseusij palvâleijeid, já sij monnii muorâkáárdán liivtah, tuosâseh já viärjuh fárustis.

₄Jeesus tieđij puoh, mii suu vuordij. Sun moonâi almai oovdeld já koijâdij: »Kiäm tij ucâvetteđ?» ₅Jeesus, tom nasaretlii», almaah västidii. Jeesus eeđâi: »Mun tot lam.»

Almai juávhust lâi meiddei Juudas, Jeesus kävildeijee. ₆Ko Jeesus eeđâi: »Mun tot lam», sij puohah kiäsádâttii já rovvii enâmân. ₇Jeesus koijâdij uđđâsist: »Kiäm tij ucâvetteđ?» Sij västidii: »Jeesus Nasaretlii.» ₈Jeesus eeđâi sijjân: »Johân mun ettim, et tot lam mun. Jis tij muu ucâvetteđ, tipteđ taid iärásijd moonnâđ.» ₉Näävt olášuvvii suu jieijâs säänih: »Toin, kiäid lah muu haaldun adelâm, jiem lah oovtâgin läpittâm.»

₁₀Simmoon Piätárist lâi miekki. Sun ruttij tom uáinusân já čuolâstij ollâpaapâ palvâleijest uálgispeelji luovâs; palvâleijee nommâ lâi Malkos. ₁₁Mut Jeesus eeđâi Piätárân: »Piejâ miekkid tuupân! Ko Eeči lii taam kaalhâ munjin adelâm, jiem-uv mun juvâččii tom?»

₁₂Uáivialmai suáldátjuávhuinis oovtâst juuvdálij palvâleijeiguin fäŋgejii tääl Jeesus, čonnii suu ₁₃já tolvuu suu vistig Hannas kuuvl. Hannas lâi ton ive ollâpaapâ Kaifas vuoppâ. ₁₄Eidu Kaifas lâi adelâm juudalijd ravvuu, et ličij pyeremus, jis ohtâ almai jámáččij ubâ aalmug peeleest.

₁₅Simmoon Piättár já mottoom eres máttááttâspärni moonáin Jeesus maajeeld. Tot nubbe lâi ollâpaapâ uápisolmooš já peesâi tondiet Jeesus fáárust ollâpaapâ lane šiiljon. ₁₆Piättár paasij čuážžuđ poortâ ulguubel, mut máttááttâspärni, kote tuubdâi ollâpaapâ, moonâi sárnuđ palvâlusnieidân, kote vahtij poortâ, já puovtij Piättár siisâ šiiljon.

₁₇Palvâlusnieidâ eeđâi Piätárân: »Jieh-uv tun-uv lah ohtâ tuon almaa máttááttâspárnáin?» »Jiem lah», västidij Piättár. ₁₈Lâi koolmâs, já tondiet palvâleijeeh já vaavtah lijjii cokkiittâm čiđâiguin tuulâ já liegâdâllii tullâpiällást. Meiddei Piättár čuážui sii juávhust liegâdâlmin.

₁₉Ollâpappâ koijâdij Jeesusist suu máttááttâspárnáin já máttááttâsâst. ₂₀Jeesus västidij: »Mun lam sárnum almolávt, ubâ maailm kulâdijn. Mun lam ain máttááttâm synagogain já temppâlist, puohâi juudalij čokkânemsoojijn. Syeligâsâst jiem lah sárnum maiden. ₂₁Mondiet tun must koijâdah? Koijâd muu kuldâleijein, maid mun lam sijjân sárnum. Kale sij tietih, maid mun lam ettâm.»

₂₂Ko Jeesus lâi västidâm näävt, ohtâ alda čuážžoo vaavtâin toškâlij suu muáđoid já eeđâi: »Nievt-uv tun västidah ollâpaapân?» ₂₃Jeesus eeđâi almai: »Jis mun sarnum puástud, te čääiti, mii muu sárnumist lâi sopâmettum. Jis mun vuod sarnum riehtâ, mondiet tun tuáškuh muu?»

₂₄Hannas vuolgâttij čonnum Jeesus ollâpappâ Kaifas kuuvl.

₂₅Simmoon Piättár čuážui liegâdâlmin. Almaah ettii sunjin: »Jieh-uv tun-uv lah ohtâ suu máttááttâspárnáin?» »Jiem lah», Piättár kieldij. ₂₆Mut mottoom ollâpaapâ palvâleijee, ton almaa hyelkki, kiäst Piättár lâi čuopâstâm peelji luovâs, eeđâi sunjin: »Kale mun oinim tuu tobbeen muorâkäärdist suin.» ₂₇Piättár kieldij vuod, já siämmást piškoi käniores.

₂₈Kaifas kulen Jeesus tolvui eennâmhiärá palacân. Lâi aarriiđeed. Juudaliih jiejah iä moonnâm palacân siisâ, amas sij nyeskiduđ, tastko mudoi sij iä liččii puáhtám puurrâđ pessijâšmáállás. ₂₉Nuuvtpa Pilatus poođij olgos sii kuuvl já koijâdij: »Mast tij suujâtvetteđ taan almaa?» ₃₀Sij västidii: »Jis sun ij liččii veritahhee, mij ep luovâttiččii suu tunjin.» ₃₁»Väldiđ jiejah suu», Pilatus eeđâi, »já tuommiđ suu jieijâd laavâi mield». Mut juudaliih ettii: »Mist ij lah lope tuommiđ oovtâgin jämimân.» ₃₂Näävt tábáhtui, vâi Jeesus säänih olášuuččii. Sun lâi ovdil almottâm, maggaar suu jäämmim šodâččij leđe.

₃₃Pilatus moonâi maassâd palacân, kočoi pyehtiđ Jeesus ovdâsis já koijâdij sust: »Lah-uv tun juudalij kunâgâs?» ₃₄Jeesus västidij: »Jieš-uv tun nuuvt jurdâččah, vâi láá-uv iärráseh ettâm must tienuuvt?» ₃₅Pilatus eeđâi: »Lam-uv mun juudalâš? Jieijâd aalmug já ollâpaapah láá tuu munjin luovâttâm. Maid tun lah porgâm?» ₃₆Jeesus västidij: »Muu kunâgâsvuotâ ij lah taan maailmist. Jis tot kulâččij taan maailmân, muu almaah liččii taištâlâm, amas mun karttâđ juudalij kieđáid. Mut muu kunâgâsvuotâ ij lah taan maailmist.» ₃₇»Tun tastoo kuittâg lah kunâgâs?» Pilatus eeđâi. Jeesus västidij: »Jieš tun eeđah, et mun lam kunâgâs. Tondiet mun lam šoddâm já tondiet puáttám taan maailmân, vâi mun tuođâštiččim tuotâvuođâst. Juáháš, kote lii tuotâvuođâst, kulá muu.» ₃₈»Mii lii tuotâvuotâ?» koijâdij Pilatus.

Ko Pilatus lâi taam ettâm, sun moonâi vuod olgos juudalij kuuvl já eeđâi sijjân: »Mun jiem uáini, et sun ličij sujâlâš moossân.

₃₉Mun laaviim lyeštiđ tii mielâ mield mottoom faaŋgâ rijjâ pessijâšjuhlij ääigi. Táttuvetteđ-uv tij, et mun luáštám rijjâ juudalij kunâgâs?» ₄₀Talle sij čuárvuškuottii: »Ele suu lyešti! Lyešti Barabbas!» – Barabbas lâi riävvár.