2. Muitalusaid girji 19
1Juda gonagas Jošafat máhcai dearvan ruktosis Jerusalemii. 2Doppe oaidni Jehu, Hanani bárdni, bođii gonagasa lusa ja dajai sutnje: “Mo don sáhtát veahkehit ipmilmeahttuma? Donhan ráhkistat Hearrá vašálaččaid. Dán dihte du deaivida Hearrá moarri. 3Dattetge don leat dahkan juoga buori. Don leat jávkadan eatnamis Ašera-čuolddaid ja leat bálvalan oskkáldasat Ipmila.”
4Jošafat ásai Jerusalemis, muhto son jođii ollu álbmoga báras Beer Šeba rájes gitta Efraima várreeatnama rádjái, ja son oaččui álbmoga fas bálvalit Hearrá, áhčiideaset Ipmila. 5Son ásahii eatnamii duopmáriid, juohke Juda ladnegávpogii iežas duopmára. 6Son dajai duopmáriidda: “Smihttet dárkilit maid dahkabehtet, danin go dii ehpet vástit duomuin olbmuide, muhto Hearrái. Son lea dinguin, go dii dubmebehtet. 7Diktet Hearrá balu oahpistit din. Ballet Hearrás, danin go Hearrá, min Ipmil, ii duotto oaidnit vearrivuođa, bealátvuođa iige duolgguid váldima.” 8Maiddái Jerusalemii Jošafat bijai levilaččaid, báhpaid ja Israela sogaid oaivámuččaid dubmet Hearrá lága mielde ja čoavdit riidoáššiid Jerusalema ássiid gaskkas. 9Son gohčui sin ná: “Meannudehket oskkáldasat ja dahket olles váimmus ja Hearrá balus dáinna lágiin: 10Juohke háve go din virgeguoimmit buktet sierra gávpogiin didjiide ášši čoavdin láhkái, jogo goddinášši dahje mo atnit lágaid ja báhkkomiid, mearrádusaid ja njuolggadusaid, de várrejehket sin, amaset šaddat sivalažžan Hearrá ovddas, nu ahte moarri deaivida din ja din virgeguimmiid. Dahket ná, amadet šaddat sivalažžan. 11Bajimusbáhppa Amarja oahpista din buot Hearrá áššiin, ja Sebadja, Ismaela bárdni, Juda oaivámuš, oahpista din gonagasa áššiin, ja levilaččat galget leat din veahkkin. Ripmet roahkkadit bargui! Vare Hearrá livččii daiguin geat dahket buriid!”
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019