Jeesus pasa máttááttâspárnái juolgijd
1Pessijâšjuhle lâi jo puátimin, já Jeesus tieđij, et lâi puáttám tot puddâ, kuás sun koolgâi vyelgiđ taan maailmist Eeji kuuvl. Sun lâi rähistâm jieijâs oomijd, kiäh lijjii taan maailmist, já sun čaaitij sijjân tievâslâš rähisvuođâ loopâ räi.
2Sij lijjii čokkânâm eehidmálásáid, já Pahakkâs lâi jo pieijâm Juudas, Simmoon Iskariot alge, vááimun jurduu, et taat kävildičij Jeesus. 3Jeesus tieđij, et Eeči lâi adelâm puoh suu vááldán já et sun lâi puáttám Immeel kulen já lâi tääl maccâmin suu kuuvl. 4Nuuvt sun čyežžilij ehidâsmälispeevdist, nuolâi mááccuhis já kiesâi alemis pirrâ piellivâšliijne. 5Talle sun leškij čääsi posâdâttâmliitán, posâškuođij máttááttâspárnái juolgijd já kuškij taid alemis pirrâ kiesâstum siholduvváin.
6Ko Jeesus poođij Simmoon Piättár puotâ, taat eeđâi: »Hiärrá, tun-uvks poosah muu juolgijd?» 7Jeesus västidij: »Taam, maid mun tääl poorgâm, tun jieh vala ibbeerd, mut maŋeláá tun tom iberdah.» 8Piättár eeđâi sunjin: »Tun jieh kuássin uážu poossâđ muu juolgijd!» Jeesus västidij: »Jis mun jiem poosâ tuu, te ij tust lah saje muu kulen.» 9Talle Simmoon Piättár eeđâi: »Hiärrá, ele poosâ tuše muu juolgijd, poosâ meiddei kieđâid já uáivi.» 10Taas Jeesus västidij: »Tot, kote lii lávgum, ij taarbâš poossâm, sun lii jo putes. Já tij leppeđ puttáh, eppeđ liijkágin puohah.» 11Jeesus tieđij, kii suu kävildičij, já tondiet sun eeđâi, et sij puohah iä lamaš puttáh.
12Ko Jeesus lâi poossâm sii juolgijd, sun kárvudâđâi máccuhân já čokánij vuod piävdán. Sun eeđâi sijjân:
»Ibbeerdvetteđ-uv tij, maid mun tijjân porgim? 13Tij sárnuttâlvetteđ muu máttáátteijen já hiärrán, já riehtâ tij porgâvetteđ: tothân mun lam. 14Jis tääl mun, tii hiärrá já máttáátteijee, lam poossâm tii juolgijd, te meiddei tij kolgâvetteđ poossâđ kuoimijdâd juolgijd. 15Mun adelim tijjân ovdâmeerhâ, vâi tij porgâččijd siämmáánáál maht mun porgim tijjân. 16Tuođâi, tuođâi: ij palvâleijee lah hiärástis stuárráb ige aairâs lah vuolgâtteijeestis stuárráb. 17Ko tij taam tietivetteđ já meiddei porgâvetteđ ton mield, te tij leppeđ avdâgâsah.
18Mun jiem eeđâ taam tist puohâin. Mun tiäđám kale, kiäid mun lam valjim. Taat čaalâ kalga šoddâđ tuottân: ’Ustevâm, kote purâdij muu peevdist, lii jorgettâm muu vuástá.’ 19Mun eeđâm taam tijjân jo tääl, ovdilgo ennustâs kiävá tuottân, nuuvt et talle ko tot šadda tuottân, tij oskoččijd, et mun tot lam tot kote lam. 20Tuođâi, tuođâi: kote váldá vuástá tom, kiäm mun vuolgâttâm, váldá vuástá muu, já kote váldá muu vuástá, váldá vuástá tom, kote lii muu vuolgâttâm.»
Jeesus oovdânpuáhtá kävildeijes
21Näävt Jeesus sáárnui. Murâšlávt sun eeđâi sijjân: »Tuođâi, tuođâi: ohtâ tist käävild muu.» 22Máttááttâspárnááh keččii kuáimásis imâštâlân, tieđehánnáá, kiäm sun uáivildij.
23Ohtâ máttááttâspárnáin, tot kote lâi Jeesusân rákkásumos, lâi eehidmálásist aaibâs suu paaldâst. 24Simmoon Piättár nuáiguttij sunjin, vâi sun koijâdičij Jeesusist, kiäm taat uáivildij. 25Máttááttâspärni mieigâstij maŋaskulij, Jeesus rade vuástá, já koijâdij: »Hiärrá, kii tot lii?» 26Jeesus västidij: »Tot, kiäs mun adelâm taam leibipitá.» Talle sun puánjustij pitá já adelij tom Juudasân, Simmoon Iskariot aalgan. 27Talle, tállân ko Juudas lâi tom finnim, Sáttán moonâi sunjin. Jeesus eeđâi sunjin: »Maid ááiguh, poorgâ tom jotelávt.» 28Kihheen ehidâsmálásân uásálistein ij iberdâm, mondiet Jeesus eeđâi sunjin näävt. 29Tastko Juudas haldâšij ohtâsii puursâ, motomeh jurdii, et Jeesus lâi koččom suu uástiđ maidnii juhle várás teikâ adeliđ adalduvâid kievhijd. 30Ko Juudas lâi puurrâm leibipitá, sun vuolgij tállân olgos. Lâi ijjâ.
Uđđâ pákkum
31Ko Juudas lâi moonnâm, Jeesus eeđâi: »Tääl Immeel Alge lii kirkesmittum, já Immeel lii kirkesmâm sust. 32Já ko Immeel lii sust kirkesmâm, kalga Immeel meiddei alnestis kirkesmittiđ suu, já Immeel parga tom uáli forgâ. 33Párnážân, tuše uánihâš áigáá mun lam tiiguin. Tij vala ucâvetteđ muu, mut mun eeđâm tääl tijjân siämmáá, maid ettim juudalijd: kuus mun moonâm, tohon tij eppeđ peesâ. 34Mun adelâm tijjân uđđâ pákkum: rähistiđ kuoimijdâd! Tego mun lam rähistâm tii, te rähistiđ tij-uv kuoimijdâd. 35Puohah tobdeh tii muu máttááttâspärnin, jis tij räähistvetteđ kuoimijdâd.»
36»Hiärrá, kuus tun moonah?» Simmoon Piättár koijâdij. Jeesus västidij: »Kuus mun moonâm, tohon tun jieh tääl pyevti puáttiđ muin, mut maŋeláá tun kale puáđáh.» 37Piättár eeđâi: »Hiärrá, mondiet mun jiem tääl peesâ tuu fáárun? Mun adelâm veik jieggân tuu peeleest.» 38Jeesus eeđâi sunjin: »Tun-uvks adelah jieggâd muu peeleest? Tuođâi, tuođâi: ovdilgo käniores piško, tun kulmii kiäldáh muu.»