Isõs čuäʹjtââtt
1Mâŋŋa tõʹst Isõs čuäʹjtõõđi eʹpet mättʼtõspäärnees Tiberiaazz jäuʹrr-reeddast. Tõt šõõddi nääiʹt: 2Semman Pietar, Fooma, koon koččuš Juuʹmǩen, Natanael Galilea Kaanast da Sebeteõõzz pääʹrn da veâl kuõʹhtt jeeʹres mättʼtõspäärna leʹjje õõutsââʹjest. 3Semman Pietar cieʹlǩi: «Mon vuâlǥam kuõʹlid šeeʹlled.» «Mij še vueʹlǧǧep mieʹldd», jeärraz cieʹlǩǩe suʹnne. Sij vuõʹlǧǧe da lauʹǩǩee võnnsa, leša tõn iinn jiâ kåddam ni mâiʹd. 4Leäi juʹn eeʹdääldõž, da Isõs čueǯǯai reeddast, leša mättʼtõspäärna jiâ tobddâm suu. 5Isõs kõõjji seeʹst: «Päärna, ij-ǥo teeʹst leäkku ni mâiʹd poorrâd?» «Ij ni mii», sij vaʹsttee. 6Son cieʹlǩi siʹjjid: «Suâppad sääiʹmid vuäʹljspeälla võnnâz, tâʹl kåʹddveʹted.» Sij suõppu, leša jiâ vuäittam teäʹnab väʹst sääiʹm ǩieʹssed, nuʹt leʹjje jiânnai kueʹl poppääm.
7Tâʹl tõt mättʼtõspäärnaž, koon Isõs räʹǩsti, cieʹlki Pietara: «Tõt lij Šurr!» Ko Pietar kuuli, što tõt leäi Šurr, son nââʹǩǩti pihttsees oolâs, tõn diõtt ko son leäi peâutää, da njuiʹǩǩii jäurra. 8Jeeʹres mättʼtõspäärna puõʹtte suuǥǥeeʹl, tõn diõtt ko sij jiâ leämmaš ko čueʹđ mettar ǩeeʹjjest reeddast. Sij ǩieʹsse mâʹŋŋlest sääiʹm kuõʹleesvuiʹm.
9Ko sij lauʹǩǩee riddu, vuõiʹnne sij, što tåʹben leʹjje toolâst kueʹl di leeiʹb päšttjeʹmmen. 10Isõs cieʹlǩi siʹjjid: «Puʹhtted tiiʹǩ tõiʹd kuõʹlid, koiʹd jeäskka kooʹddid.» 11Semman Pietar mõõni võnnsa da ǩieʹzzi sääiʹm riddu jõnn kuõʹlivuiʹm. Sääiʹmest leʹjje čueʹtt vittlo kolmm kueʹlled. Håʹt-i leʹjje jiânnai kueʹl, säiʹmm ij ni ǩeâškkjam.
12Isõs cieʹlǩi: «Pueʹtted poorrâd.» Ij ni õhtt mättʼtõspäärnain tuõsttâm kõõččâd, ǩii son leäi. Sij puk tiõʹtte, što son leäi Šurr jiõčč. 13Isõs pueʹđi tollpeällsa, vaaʹldi leeiʹb da kuõʹlid da juõʹjji siʹjjid. 14Nääiʹt Isõs kuälmad vuâra juʹn čuäʹjtõõđi mättʼtõspäärnees, mâŋŋa tõʹst ko leäi mårrnam jaaʹmmjest.
Isõs da Pietar
15Ko sij leʹjje poorrâm, Isõs kõõjji Semman Pietarest: «Semman, Evvan âʹlǧǧ, räʹǩstak-a ton muu jeäʹnab ko täk jeärraz?» Tät vaʹsttii: «Šurr, ton teâđak, što räʹǩstam tuu.» Isõs cieʹlǩi: «Poorât muu läbbsään.» 16Mâŋŋa son kõõjji oʹđđest: «Semman, Evvan âʹlǧǧ, räʹǩstak-a muu?» Pietar vaʹsttii: «Šurr, ton kâʹl teâđak, što räʹǩstam tuu.» Isõs cieʹlǩi suʹnne: «Peâmm muu saauʒään.» 17Son kõõjji veâl kuälmad vuâra: «Semman, Evvan âʹlǧǧ, räʹǩstak-a muu?» Tâʹl Pietar samai täärmtõõvi, ko Isõs kuälmad vuâra kõõjji seämmanalla. «Šurr», son cieʹlǩi, «ton teâđak puk da tõn še, što mon räʹǩstam tuu.» Isõs cieʹlǩi: «Poorât muu saauʒään. 18Tuõđi, tuõđi, mon ceälkam tuʹnne: ko leʹjjiǩ nuõrr, čõʹnniǩ jiõčč puäkknjad da mõʹnniǩ, koozz tattuk; leša ko puärsmak, vuäǯǯak ǩeeiʹjeed ǩiõđääd, da nuʹbb čâânn puäkknjad da veekk tuu tåk, koozz ton jiõk täätt.» 19Nääiʹt Isõs čõõđti, måkam jäämmʼmõõžžin Pietar leäi puʹhtted Vuâsppååda ciist. Mâŋŋa son cieʹlǩi Pietara: «Jååʹđ muu mieʹldd.»
Mättʼtõspäärnaž, koon Isõs räʹǩsti
20Pietar poonnjlõõđi da vuõiʹni jiijjâs tueʹǩǩen tõn mättʼtõspäärna, koon Isõs räʹǩsti. Tät leäi leämmaž poorrmen Isõõzz ââlda da leäi kõõččâm: «Šurr, ǩii lij tuu ploott?» 21Ko Pietar suu vuõiʹni, son kõõjji Isõõzzâst: «Šurr, mäʹhtt suu ååʹn ǩeävv?»
22Isõs vaʹsttii: «Håʹt mon täättčem, što son jeäll nuʹt kuuʹǩǩ ko mon puäđam, mâiʹd tõt tuʹnne kooll? Jååʹđ ton muu mieʹldd.»
23Nåkam saakk liâvvni viillji kõʹsǩǩe, što tõt mättʼtõspäärnaž ij jäämče. Nuʹt Isõs iʹlleäm ceälkkam; son tåʹlǩ leäi ceälkkam: «Håʹt mon täättčem, što son jeäll nuʹt kuuʹǩǩ, ko mon puäđam, mâiʹd tõt tuʹnne kooll.»
24Son lij tõt mättʼtõspäärnaž, kååʹtt tuõđašt täʹst da lij ǩeeʹrjtam tän puk. Mij tieʹttep, što suu tuõđštõssʼses vuäitt naʹddjõõttâd.
25Jiânnai veâl jeeʹresnallšem tuâjaid Isõs tuejjii. Jõs tõiʹd puk ǩeeʹrjteʹččeš mušttu, mon joordam, što jiâ ni koozz tän maaiʹlme čaaǥǥče tõk ǩeeʹrj, mõõk õõlǥče ǩeeʹrjted.
