Sálbma 88
88188,1 Mahalat soaitá leat nuohta namma. esrahlaš Heman viissis olmmái. Vrd. 1 Gon 4,31; 1 Muit 2,6.Lávlla, korahlaččaid sálbma. Koarrajođiheaddjái. Lávlojuvvo dego “Mahalat”. Esrahlaš Hemana oahpahansálbma.
2
Hearrá, mu bestojumi Ipmil,
mun čuorvvun du ijatbeaivái.
3Divtte mu rohkosa boahtit
du muođuid ovdii,
jorgal bealji mu čuorvasa beallái!
4Mu siellu lea gallánan oasehisvuođas,
mun lean lahka jábmiidáimmu.
5Mun adnojuvvon daid láhkásažžan
geat njidjet hávdái,
lean dego olmmái
gii lea massán eallinfámu.
6Mun lean guđđojuvvon jábmiid searvái,
mun lean dego goddojuvvon olbmot
geat veallájit hávddis,
dat geaid don it šat muitte,
geaid du giehta ii veahket.
7
Don leat bálkestan mu čiekŋalis roggái,
sevdnjes, botnihis skurčui.
8
Du moarri deaddá mu lossadit,
du siiggát márret mu badjel. Sela
9
Don leat ádján eret oahppásiid mu luhtte,
nu fastin don leat dahkan mu sin čalmmiin.
Mun lean dahppojuvvon sisa,
in beasa olggos.
10
Hearrá, mu čalmmit leat čuovggahuvvan,
geažos beaivvi mun čuorvvun du
ja geaigguhan gieđaid du guvlui.
11
Dagatgo don oavdduid jábmiide,
čuožžilitgo jámežat máidnut du? Sela
12Muitaluvvogo hávddis
du árbmugasvuohta,
jábmiidáimmus, ahte leat oskkáldas?
13Leatgo du oavdudagut dovdosat
seavdnjadasas,
du buorrevuohta vajáldumi eatnamis?
14
Muhto mun čuorvvun du, Hearrá,
iđedis juo mu rohkadus badjána du ovdii.
15
Hearrá, manne leat hilgon mu,
manne čiegat mus muođuidat?
16Nuorravuođa rájes
mun lean leamaš vártnuheapme
ja lahka jápmima.
Mun guottán du balddáhusaid
ja dorvvuhuvan.
17Du buolli moarri lea mannan mu badjel,
balddáhusat duššadit mu.
18Geažos beaivvi
dat leat mu birra dego čáhci,
dat birastahttet mu juohke guovllus.
19Buot mu ustibiid ja lagaš olbmuid
don leat ádján mu luhtte,
seavdnjadas lea mu áidna oahpis.