Davvisámegiel Biibbal 2019 (Biibbal)
13

Láhka spihtáldávddas

131Hearrá sártnui Mosesii ja Aronii:

2

13,2
5 Mos 24,8
13,2 spihtáldávda Hebreagiel sátni sáhttá maid mearkkašit iešguđetlágán ihtalumiid ja liikedávddaid. ▶ spihtáldávda. Sátni adnojuvvo maid dalle go lea sáhka biktasiid ja viesuid guohppagis. Vrd. 13,47eč; 14,33eč.Jos soapmásii šaddá bohtaneapmi, ihtalupmi dahje vilges dielku mii sáhttá leat spihtáldávda, de su galgá doalvut báhppa Arona dahje muhtun su soga báhpa lusa. 3Báhppa galgá geahčadit ihttondielkku, ja jos guolggat leat vilggodan ja dielku lea čiekŋaleappos go eará liiki, de dat lea spihtáldávda. Go báhppa oaidná dan, de son galgá gulahit su buhtismeahttumin. 4Jos dielku lea vielgat, muhto dat ii leat čiekŋaleappos go eará liiki eaige guolggat leat vilggodan, de báhppa galgá sirret buohcci eará olbmuin čieža beaivái. 5Čihččet beaivvi báhppa galgá geahčadit su, ja jos son oaidná ahte ihttondielku ii leat nuppástuvvan iige viidon, de son galgá sirret su eará olbmuin vel čieža beaivái. 6Čihččet beaivvi báhppa galgá fas geahčadit su, ja jos son oaidná ahte ihttondielku lea gilggodan iige leat viidon, de báhppa galgá gulahit su buhtisin; dat lea dušše ihtalupmi. Buohcci galgá bassat biktasiiddis, ja de son lea buhtis.

7Muhto jos ihtalupmi viidu su liikkis maŋŋil go son lea čájehan iežas báhppii ja báhppa gulahii su buhtisin, de son galgá fas mannat báhpa lusa. 8Báhppa galgá geahčadit su, ja jos son oaidná ahte ihtalupmi lea viidon, de son galgá gulahit su buhtismeahttumin; dat lea spihtáldávda.

9Jos muhtun buohccá spihtáldávdii, de su galgá doalvut báhpa lusa. 10Báhppa galgá geahčadit su, ja jos liikkis dalle lea vilges bohtaneapmi, jos guolggat leat vilggodan ja jos bohtaneapmái lea šaddan liigeoažži, 11de dat lea bissovaš spihtáldávda. Su ii dárbbaš šat sirret eará olbmuin, go son lea juo gávnnahuvvon buhtismeahttumin, ja báhppa galgá gulahit su buhtismeahttumin.

12Jos spihtáldávda ihtá liikái, nu ahte dat lea buohcci olbmo liikkis oaivvi rájes gitta julggiid rádjái miehtá buot, 13de báhppa galgá geahčadit su. Jos báhppa oaidná ahte spihtáldávda gokčá oppa rupmaša, de son galgá gulahit su buhtisin. Go buohcci lea vilggodan ollásit, de son lea buhtis. 14Muhto jos liikái ihtá liigeoažži, de son lea dallánaga buhtismeahttun. 15Go báhppa oaidná liigeoačči, de son galgá gulahit su buhtismeahttumin. Dat lea liigeoažži, son lea buhtismeahttun; dat lea spihtáldávda. 16Muhto jos liigeoažži nuppástuvvá ja vilggoda, de buohcci galgá mannat báhpa lusa. 17Báhppa galgá geahčadit su, ja jos son oaidná ahte ihttondielku lea vilggodan, de báhppa galgá gulahit su buhtisin; son lea fas buhtis.

18Jos soapmása liikái ihtá buogu mii dasto buorrána, 19ja de buhkko sadjái ihtá vilges bohtaneapmi dahje čuvgesrukses dielku, de son galgá mannat báhpa lusa. 20Báhppa galgá geahčadit su, ja jos dielku lea čiekŋaleappos go eará liiki ja guolggat dakko leat vilggodan, de báhppa galgá gulahit su buhtismeahttumin; buhkko sadjái lea ihtán spihtáldávda. 21Muhto jos báhppa geahčadettiin oaidná ahte guolggat eai leat vilggodan iige dielku leat čiekŋaleappos go eará liiki ja ahte dat lea gilggodan, de son galgá sirret su eará olbmuin čieža beaivái. 22Jos dielku viidu liikkis, de báhppa galgá gulahit su buhtismeahttumin; dat lea spihtáldávda. 23Muhto jos dielku bissu seammalágánin iige viiddo, de dat lea buhkko uddu, ja báhppa galgá gulahit su buhtisin.

24Jos soamis lea ožžon liikái buolláma ja dasa ihtá oažži čuvgesrukses dahje vilges dielkun, 25de báhppa galgá geahčadit su. Jos son oaidná ahte guolggat leat vilggodan ja dielku lea čiekŋaleappos go eará liiki, de buollámii lea ihtán spihtáldávda. Báhppa galgá gulahit su buhtismeahttumin; dat lea spihtáldávda. 26Muhto jos báhppa geahčadettiin oaidná ahte dielkkus eai leat vilges guolggat iige dat leat čiekŋaleappos go eará liiki ja ahte dat lea gilggodan, de báhppa galgá sirret su eará olbmuin čieža beaivái. 27Čihččet beaivvi báhppa galgá geahčadit su, ja jos dielku lea viidon, de báhppa galgá gulahit su buhtismeahttumin; dat lea spihtáldávda. 28Muhto jos dielku ii leat nuppástuvvan iige viidon liikkis, ja jos dat lea gilggodan, de dat lea buolláma uddu. Báhppa galgá gulahit su buhtisin, dasgo dat lea dušše buolláma uddu.

29Jos olbmái dahje nissonii šaddá ihtalupmi oaiveassái dahje skávžžáid vuollái, 30de báhppa galgá geahčadit ihttondielkku. Jos dat lea čiekŋaleappos go eará liiki ja das leat guvggodan njárbes guolggat, de báhppa galgá gulahit su buhtismeahttumin. Dat lea ruobbi, spihtáldávda oaiveasis dahje skávžžáid vuolde. 31Jos báhppa geahčadettiin oaidná ahte ruobbás sadji ii leat čiekŋaleappos go eará liiki, muhto das eai leat čáhppes guolggat, de son galgá sirret buohcci eará olbmuin čieža beaivái. 32Čihččet beaivvi báhppa galgá geahčadit buohcci, ja jos ruobbi ii leat viidon eaige das leat guvges guolggat iige dat leat čiekŋaleappos go eará liiki, 33de buohcci galgá ráhket vuovttaid ja skávžžáid, muhto diktit ruobbesaji leat ráhkekeahttá. Báhppa galgá sirret buohcci eará olbmuin vel čieža beaivái. 34Čihččet beaivvi báhppa galgá geahčadit ruoppi, ja jos son oaidná ahte dat ii leat viidon iige čiekŋaleappos go eará liiki, de báhppa galgá gulahit su buhtisin. Buohcci galgá bassat biktasiiddis, ja de son lea buhtis. 35Muhto jos ruobbi viidu liikkis maŋŋil go son lea gulahuvvon buhtisin, 36de báhppa galgá geahčadit su. Jos ruobbi lea viidon liikkis, de báhppa ii dárbbaš ohcat guvges guolggaid; dat olmmoš lea buhtismeahttun. 37Muhto jos báhppa oaidná ahte ruobbi ii leat nuppástuvvan ja dasa leat šaddan čáhppes guolggat, de ruobbi lea buorránan. Dat olmmoš lea buhtis, ja báhppa galgá gulahit su buhtisin.

38Jos olbmá dahje nissona liikái šaddet vilges dielkkut, 39de báhppa galgá geahčadit daid. Jos dielkkut leat šovkesvielgadat, de dat lea dakkár ihtalupmi mii ii leat váralaš; dat olmmoš lea buhtis.

40Jos olmmái massá vuovttaid oalát nu ahte su oaivi báljaga, de son lea liikká buhtis. 41Seammá ládje son lea buhtis, jos son massá vuovttaid oaivečohkas. 42Muhto jos su báljagan oaivái dahje oaivečohkkii šaddá čuvgesrukses dielku, de dasa lea ihtán spihtáldávda. 43Báhppa galgá geahčadit su, ja jos son gávdná čuvgesrukses bohtaneami báljagan oaivvis dahje báljagan oaivečohkas, ja dat orru leamen spihtáldávda, 44de dat olmmái lea spihtálaš. Son lea buhtismeahttun, ja báhppa galgá gulahit su buhtismeahttumin; dan olbmás lea dávda oaiveasis.

45

13,45
Esek 24,1722
Mi 3,7
Dat geas lea spihtáldávda, galgá atnit gaikkoduvvon biktasiid, vázzit rabas oivviid, čiehkat skávžžáid ja čuorvut: “Buhtismeahttun, buhtismeahttun!” 46
13,46
14,3
4 Mos 5,2č
12,14
Nu guhká go sus lea duot dávda, de son lea buhtismeahttun. Son lea buhtismeahttun, ja son galgá ássat sierranassii siidda olggobealde.

4713,47 spihtálguohpa Seammá hebreagiel sátni lea jorgaluvvon “spihtáldávda”. Vrd. 13,2eč.Jos spihtálguohpa ihtá ullobiktasii dahje beallemasbiktasii, 48dahje mange diŋgii mii lea čuldojuvvon dahje gođđojuvvon beallemasas dahje ullus, dahje náhkkái dahje náhkkeduodjái, 49ja dielku lea ruodnájeaddji dahje ruoksájeaddji, leaččai dat dal biktasis, náhkis, čuldojuvvon ja gođđojuvvon duojis dahje náhkkeduojis, de dat lea spihtálguohpa, ja dan galgá čájehit báhppii. 50Báhppa galgá geahčadit dielkku ja bidjat čieža beaivái sierra dan diŋgga mas dielku lea. 51Čihččet beaivvi son galgá fas geahčadit dan, ja jos dielku lea viidon biktasis dahje čuldojuvvon dahje gođđojuvvon duojis dahje náhkkeduojis, de dat lea bahášlájat spihtál, ja dat duodji dahje diŋga lea buhtismeahttun. 52Dat galgá boldojuvvot, leaččai dat dal bivttas dahje juoga mii lea čuldojuvvon dahje gođđojuvvon ullus dahje beallemasas dahje náhkkeduodji, mii ihkinassii masa dielku lea boahtán. Danin go dat lea bahášlájat spihtál, de dan diŋgga dahje duoji galgá boaldit.

53Muhto jos báhppa geahčadettiin gávnnaha ahte dielku ii leat viidon biktasis dahje čuldojuvvon dahje gođđojuvvon duojis dahje náhkkeduojis, 54de son galgá gohččut bassat dan diŋgga mas dielku lea, ja bidjat dan sierra vel čieža beaivái. 55Báhppa galgá geahčadit dielkku bassama maŋŋil, ja jos dat ii leat nuppástuvvan iige viidon, de duot diŋga dahje duodji lea buhtismeahttun; dan galgá boaldit. Dat lea guohcageapmi, gokko dat dal leažžáge. 56Muhto jos báhppa geahčadettiin gávnnaha ahte dielku lea gilggodan bassama maŋŋil, de son galgá gaikut dan eret biktasis dahje náhkis dahje čuldojuvvon dahje gođđojuvvon duojis. 57Jos dielku ihtá ođđasis biktasii dahje čuldojuvvon dahje gođđojuvvon duodjái dahje náhkkeduodjái, de dat lea viidon. Dakkár diŋgga mas dielku lea, galgá boaldit. 58Jos dielku jávká biktasis dahje čuldojuvvon dahje gođđojuvvon diŋggas dahje duojis dahje náhkkeduojis go dat bassojuvvo, de dan galgá bassat vel nuppádis, ja de dat lea buhtis.

59Dása nohká láhka mii guoská spihtálii mii lea ullobiktasis dahje beallemasbiktasis, čuldojuvvon dahje gođđojuvvon duojis ja náhkkeduojis; dán lága mielde dan galgá gulahit buhtisin dahje buhtismeahttumin.

14

Buhtástus spihtáldávddas

141Hearrá sártnui Mosesii:

2

14,2
Matt 8,4
Luk 17,14
Dát láhka guoská dasa go spihtálaš olmmoš gulahuvvo buhtisin. Su galgá doalvut báhpa lusa. 3Báhppa galgá boahtit su ovddal siidda olggobeallái. Báhppa galgá geahčadit su, ja jos spihtáldávda lea buorránan, 414,4 isopa isop.de báhppa galgá gohččut viežžat guokte buhtis ealli lotti, sedermuora, karmosinrukses ullu ja isopa dan várás gii gulahuvvo buhtisin. 5Báhppa galgá gohččut goddit nuppi lotti dakkár láirelihti badjelis mas lea ráinnas čáhci. 6De son galgá váldit ealli lotti ja sedermuora, karmosinrukses ullu ja isopa ja buonjostit buot, maiddái ealli lotti, dan lotti varas mii goddojuvvui ráinnas čázi badjelis. 7Čieža geardde son galgá riškkuhit dán čáhceseagat vara dan olbmo ala gii buhtistuvvo spihtáldávddas. De son galgá gulahit su buhtisin ja de luoitit ealli lotti girdilit. 8Dat gii buhtistuvvo, galgá bassat biktasiiddis, ráhket vuovttaidis ja basadit. De son šaddá buhtisin ja oažžu máhccat siidii, muhto son galgá dattetge orrut čieža beaivvi iežas goađi olggobealde. 9Čihččet beaivvi son galgá ráhket vuovttaidis, skávžžáidis, gulbmeguolggaidis ja eará guolggaidis. Son galgá bassat biktasiiddis ja basadit, ja de son lea buhtis.

1014,10 ovtta log-mihtu sullii 0,5 lihttera.Gávccát beaivvi son galgá váldit guokte viercalábbá mat leat almmá vigi haga, ja jahkásaš njiŋŋelas lábbá mii lea almmá vigi haga. Son galgá maid váldit borramušoaffarin golbma oljjuin seaguhuvvon efalogádasa sevlejuvvon jáffuid ja ovtta log-mihtu oljju. 11Báhppa gii doaimmaha buhtisteami, galgá buktit dan olbmo gii buhtistuvvo ja oaffarattáldagaid almmustusgoađi uvssa lusa Hearrá muođuid ovdii. 1214,12 bajidit >7,30.Báhppa galgá váldit nuppi viercalábbá ja oaffaruššat dan vealgeoaffarin oktan oljjuin. Son galgá bajidit dan oaffarin Hearrá muođuid ovdii. 13

14,13
7,1eč
Viercaláppis galgá goddojuvvot seammá bassi sajis gos suddooaffar ja boaldinoaffar goddojuvvojit. Vealgeoaffarealli gullá báhppii nugo suddooaffareallige; dat lea allabassi. 14
14,14
8,23eč
Báhppa galgá váldit veaháš vealgeoaffara vara ja sihkkut dan dan olbmui gii buhtistuvvo, su olgeš bealljebuoiddážii, olgeš bealgái ja olgeš juolgebealgái. 15De báhppa galgá váldit veaháš oljju ja njorret dan gurut gihtii, 16buonjostit olgeš gieđa čuvddi dan oljjus mii lea su gurut gieđas, ja riškkuhit oljju suorpmain čieža geardde Hearrá muođuid ovddas. 17Báhppa galgá váldit veaháš oljju mii sus lea gieđas, ja sihkkut dan dan olbmui gii buhtistuvvo, su olgeš bealljebuoiddážii, olgeš bealgái ja olgeš juolgebealgái, vealgeoaffara vara ala. 18Dan oljju mii vel lea báhcán báhpa gihtii, son galgá sihkkut dan olbmo oaivái gii buhtistuvvo. Ná báhppa doaimmaha sutnje soabahusa Hearrá muođuid ovddas. 19Dasto báhppa galgá oaffaruššat suddooaffara ja doaimmahit soabahusa dasa gii buhtistuvvo buhtismeahttunvuođas. De báhppa galgá njuovvat boaldinoaffarealli 20ja oaffaruššat dan ja borramušoaffara áltára alde. Báhppa galgá doaimmahit sutnje soabahusa, ja de son lea buhtis.

21Muhto jos dat gii buhtistuvvo, lea geafes olmmái iige suitte skáhppot dáid oaffarattáldagaid, de son galgá váldit vealgeoaffarin lábbá mii bajiduvvo soabahussan sutnje. Dasa lassin son galgá váldit borramušoaffarin efalogádasa oljjuin seaguhuvvon sevlejuvvon jáffuid ja ovtta log-mihtu oljju 22

14,22
5,7
12,8
ja vel guokte turtelduvvá dahje guokte eará duvvá, dađe mielde go suitá. Nubbi galgá addojuvvot suddooaffarin ja nubbigis boaldinoaffarin. 23Gávccát beaivvi das maŋŋil go son lea buhtistuvvon, son galgá buktit dáid oaffarattáldagaid báhppii almmustusgoađi uvssa lusa, Hearrá muođuid ovdii. 24Báhppa galgá váldit vealgeoaffarlábbá ja oljju ja bajidit daid oaffarin Hearrá muođuid ovddas. 25Vealgeoaffarlábbá galgá njuovvat, ja báhppa galgá váldit dan vara ja sihkkut dan dan olbmui gii buhtistuvvo, su olgeš bealljebuoiddážii, olgeš bealgái ja olgeš juolgebealgái. 26Dasto báhppa galgá njorret oljju gurut gihtii 27ja riškkuhit olgeš čuvddiin oljju mii lea su gurut gieđas, čieža geardde Hearrá muođuid ovddas. 28Oljju mii lea su gieđas, son galgá sihkkut dan olbmui gii buhtistuvvo, su olgeš bealljebuoiddážii, olgeš bealgái ja olgeš juolgebealgái, vealgeoaffara vara ala. 29Oljju mii vel lea báhcán báhpa gihtii, son galgá sihkkut dan olbmo oaivái gii buhtistuvvo. Ná báhppa doaimmaha sutnje soabahusa Hearrá muođuid ovddas. 30De son galgá oaffaruššat oktanaga borramušoaffariin turtelduvváid dahje eará duvváid, dađe mielde go suitá, 31nuppi suddooaffarin ja nuppigis boaldinoaffarin. Ná báhppa doaimmaha soabahusa dasa gii buhtistuvvo Hearrá muođuid ovddas. 32Dát láhka guoská dakkár spihtálaš olbmo buhtisteapmái geas ii leat vallji.

Viesuid spihtálguohpa

33Hearrá sártnui Mosesii ja Aronii: 3414,34 spihtálguohppaga Teavstta hebreagiel sáni mearkkašupmi lea maid “liikedávda” dahje “guohpadávda”. Vrd. 13,2eč.47eč. ▶ spihtáldávda.Go dii lehpet boahtán Kanaanii maid mun attán din opmodahkan, ja mun divttán spihtálguohppaga njoammut doppe soames vissui, 35de viesu eaiggát galgá mannat muitalit báhppii ahte su vissui lea njommon juoga mii orru leamen spihtálguohpa. 36Ovdal go báhppa manná geahčadit dielkkuid, de son galgá gohččut gurret viesu; muđui buot mii dálus lea, šaddá buhtismeahttumin. De báhppa galgá mannat geahčadit viesu. 37Jos son gávnnaha ahte dielkkut seinniin leat ruodnájeaddji dahje ruoksájeaddji borraluvvamat mat orrot leamen čiekŋaleappos go seaidni, 38de son galgá boahtit olggos uksanjálbmái ja dahppat viesu čieža beaivái. 39Čihččet beaivvi báhppa galgá máhccat geahčadit, ja jos son gávnnaha ahte dielkkut leat viidánan viesu seinniin, 40de son galgá gohččut gaikut eret daid geđggiid main dielkkut leat, ja bálkestit daid gávpoga olggobeallái buhtismeahttun sadjái. 41Viesu siskkobeali galgá faskut miehtá, ja faskojuvvon láirri galgá bálkestit gávpoga olggobeallái buhtismeahttun sadjái. 42De galgá váldit eará geđggiid ja bidjat daid ovddit geđggiid sadjái, ja seinniid galgá sihkkut ođđa láirriin.

43Jos dielkkut ihtet maŋŋil go geađggit leat gaikojuvvon ja seainnit leat faskojuvvon ja sihkkojuvvon ođđa láirriin, 44de báhppa galgá boahtit geahčadit dan. Jos son de oaidná ahte dielkkut leat viidánan, de viesus lea bahásšlájat spihtálguohpa. Dat lea buhtismeahttun. 45Viesu galgá gaikkodit, ja dan geđggiid, muoraid ja láirri galgá doalvut gávpoga olggobeallái buhtismeahttun sadjái.

46Dat gii fitná viesus dan botta go dat lea dahppojuvvon, lea buhtismeahttun eahkeda rádjái. 47Juohkehaš gii oađđá ja borada viesus, galgá bassat biktasiiddis.

48Muhto jos báhppa boahtá ja oaidná ahte dielkkut eai leat ihtán maŋŋil go viessu sihkkojuvvui, de son galgá gulahit dan buhtisin, danin go spihtálguohpa lea jávkan. 49Viesu buhtisteami várás son galgá váldit guokte lotti, sedermuora, karmosinrukses ullu ja isopa. 50Nuppi lotti son galgá goddit láirelihti badjelis mas lea ráinnas čáhci. 51De son galgá váldit sedermuora, isopa ja karmosinrukses ullu ja ealli lotti, ja buonjostit daid goddojuvvon lotti varas ja ráinnas čázis ja riškkuhit dainna viesu čieža geardde. 52Go son lea buhtistan viesu lotti varain ja ráinnas čáziin, ealli lottiin, sedermuorain, isopiin ja karmosinrukses ulluin, 53de son galgá luoitit ealli lotti girdilit eret gávpogis. Go son ná lea doaimmahan vissui soabahusa, de viessu lea buhtis.

54Dát láhka guoská juohkelágán spihtáldávdii ja ruobbái, 55biktasiid ja viesuid spihtálguohppagii, 56bohtanemiide, ihtalumiide ja vilges dielkkuide, 57vai olmmoš diehtá goas miige lea buhtismeahttun ja goas dat lea buhtis. Dát láhka guoská spihtálii.

15

Buhtismeahttun golgan

151Hearrá sártnui Mosesii ja Aronii:

2Daddji israellaččaide: Jos olbmá rupmašis lea oačči golgan, de dat lea buhtismeahttun golgan. 3Son lea buhtismeahttun nu guhká go su váivi bistá, leaččai dal golgan dahje ii. 4Buot man alde buohcci veallá ja buot man alde son čohkká, šaddá buhtismeahttumin. 5Juohkehaš gii guoská su oađđinsadjái, galgá bassat biktasiiddis ja basadit; son lea buhtismeahttun eahkeda rádjái. 6Juohkehaš gii čohkána dakkár sadjái mas buohcci lea čohkkán, galgá bassat biktasiiddis ja basadit; son lea buhtismeahttun eahkeda rádjái. 7Juohkehaš gii guoskkaha buohcci, galgá bassat biktasiiddis ja basadit; son lea buhtismeahttun eahkeda rádjái. 8Jos dat gii buohcá golgama, čolgada buhtis olbmo ala, de dat geasa čolga lea deaivan, galgá bassat biktasiiddis ja basadit; son lea buhtismeahttun eahkeda rádjái. 9Juohke diŋga man alde buohcci lea čohkkán riidedettiin, šaddá buhtismeahttumin. 10Jos muhtun guoská diŋgii mii lea leamaš buohcci vuolde, de son lea buhtismeahttun eahkeda rádjái. Jos muhtun giehtaguššá dakkár diŋgga, de son galgá bassat biktasiiddis ja basadit; son lea buhtismeahttun eahkeda rádjái. 11Jos olmmái gii buohcá golgama, guoská muhtun olbmui ovdal go lea doidán gieđaid čázis, de dat olmmoš geasa son guoskkai, galgá bassat biktasiiddis ja basadit; son lea buhtismeahttun eahkeda rádjái. 12Láirelihti masa buohcci lea guoskan, galgá cuvket, muhto muorralihti galgá doidit čázis.

13Go buohcci buorrána váivvistis, de su buhtástusáigi lea čieža beaivvi. Dasto son galgá bassat biktasiiddis ja basadit ráinnas čázis, ja de son lea buhtis. 14

15,14
1,14
5,7
12,8
Gávccát beaivvi son galgá váldit guokte turtelduvvá dahje guokte eará duvvá ja boahtit Hearrá muođuid ovdii almmustusgoađi uvssa lusa ja addit daid báhppii. 15Báhppa galgá oaffaruššat nuppi suddooaffarin ja nuppi boaldinoaffarin. Ná báhppa galgá Hearrá muođuid ovddas doaimmahit sutnje soabahusa buhtismeahttunvuođas mii lei boahtán golgamis.

16Jos olbmás manná siepman, de son galgá bassat oppa rupmaša; son lea buhtismeahttun eahkeda rádjái. 17Buot biktasiid ja juohke náhkkeduoji man ala siepman lea boahtán, galgá bassat čázis; dat leat buhtismeahttumat eahkeda rádjái. 18Jos olmmái veallá nissoniin ja sus manná siepman, de soai galgaba basadit; soai leaba buhtismeahttumat eahkeda rádjái.

19Go nissonis leat mánodávddat ja varra golgá su rupmašis, de son lea buhtismeahttun čieža beaivvi. Dat gii guoská sutnje, lea buhtismeahttun eahkeda rádjái. 20Buot man alde son veallá mánodávddaid áigge, šaddá buhtismeahttumin, ja buot man alde son čohkká, šaddá buhtismeahttumin. 21Dat gii guoská su oađđinsadjái, galgá bassat biktasiiddis ja basadit; son lea buhtismeahttun eahkeda rádjái. 22Dat gii guoská masage man alde son lea čohkkán, galgá bassat biktasiiddis ja basadit; son lea buhtismeahttun eahkeda rádjái. 23Jos soamis guoská masage mii lea su oađđinsajis dahje man alde son lea čohkkán, de son lea buhtismeahttun eahkeda rádjái. 24Jos olmmái veallá nissoniin, de su mánodávddat dahket olbmá buhtismeahttumin čieža beaivái. Buot man alde olmmái veallá, šaddá buhtismeahttumin.

25Jos nissonis leat vardimat máŋga beaivvi, vaikko dat eai leat su mánodávddat, dahje jos mánodávddat bistet badjel áiggi, de son lea buhtismeahttun nu guhká go vardimat bistet, nugo mánodávddaid áiggege. 26Buot man alde son veallá dahje čohkká vardimiid áigge, šaddá buhtismeahttumin nugo mánodávddaid áiggege. 27Juohkehaš gii guoská daidda, šaddá buhtismeahttumin ja galgá bassat biktasiiddis ja basadit; son lea buhtismeahttun eahkeda rádjái.

28Go nisson buhtistuvvo vardimiinnis, de su buhtástusáigi lea čieža beaivvi; de son lea buhtis. 29

15,29
1,14
5,7
12,8
Gávccát beaivvi son galgá váldit guokte turtelduvvá dahje guokte eará duvvá ja buktit daid báhppii almmustusgoađi uvssa lusa. 30Báhppa galgá oaffaruššat nuppi suddooaffarin ja nuppigis boaldinoaffarin. Ná báhppa doaimmaha Hearrá muođuid ovddas sutnje soabahusa su vardimiin mat dahke su buhtismeahttumin.

31Dii galgabehtet várjalit israellaččaid buhtismeahttunvuođas, vai sii eai jáme dan dihte go dahket buhtismeahttumin mu goađi, mii lea sin gaskkas.

32Dát láhka guoská olbmái geas leat golgamat dahje geas manná olggos siepman, nu ahte son šaddá buhtismeahttumin, 33nissonii geas leat mánodávddat, ja juohkehažžii, olbmái dahje nissonii, geas leat golgamat, ja olbmái gii veallá buhtismeahttun nissoniin.