Davvisámegiel Biibbal 2019 (Biibbal)
15

151Muhtin áiggi geažes, nisorádjanáigge, Samson bođii fitnat áhkás luhtte, ja sus lei mielde gihcci. Son dajai áhkás áhččái: “Divtte mu mannat áhkkán lusa su gámmárii.” Muhto áhká áhčči ii luoitán su dohko. 2Son dajai: “Munhan gádden ahte don ledjet hilgon su, ja danin mun adden su du lagamus headjaolbmái. Muhto váldde áhkkán su nuorat oappá, sonhan lea vel čábbátge.” 3Samson dajai: “Dán háve mun in šatta sivalažžan, jos vahágahtán filistalaččaid.”

4De Samson vulggii doppe ja čohkkii golbmačuođi riebana. Son válddii spáidariid, čanai ain guokte riebana seaibbis oktii ja bijai spáidara seibbiid gaskii. 5Dasto son cahkkehii spáidariid ja luittii riebaniid filistalaččaid gordnebealdduide ja bolddii sihke gordnegihpuid ja čuohpakeahtes gortni, ja daidda lassin bulle velá viidnegárddit ja oliivagárddit. 6

15,6
14,15eč
Filistalaččat jerre: “Gii dagai dán?” Sii gulle ahte Samson, timnalačča vivva, lei dahkan dan máksun das ahte son lei addán Samsona áhká su lagamus headjaolbmái. Dalle filistalaččat vulge Timnai ja bolde sihke nissona ja su áhči. 7Samson dajai sidjiide: “Go dii dahkabehtet dákkáriid, de mun in heaitte ovdal go lean mávssahan didjiide.” 8Ja son fallehii sin, cápmii sin dávttiid moallun ja gottii sis eatnagiid. Dasto son vulggii Etama bákteskorrui ja orrui dohko.

915,9 Lehi Namma mearkkaša “oaloldávtti”. Vrd. v. 15–17.Filistalaččat johttájedje, dahke soahtesiidda Judai ja lávde Lehi lahkosiidda. 10Juda olbmát jerre: “Manin dii lehpet vuolgán min vuostá?” Filistalaččat vástidedje: “Mii leat boahtán váldit gitta Samsona ja dahkat sutnje seammá ládje go son dagai midjiide.” 11Dalle golbmaduhát Juda olbmá manne Etama bákteskoaru lusa ja dadje Samsonii: “Almma don dieđát ahte filistalaččat ráđđejit dáppe? Manin don leat dahkan dán midjiide?” Son vástidii: “Mun dahken sidjiide nugo sii dahke munnje.” 12Olbmát dadje: “Mii leat boahtán váldit du gitta ja addit du filistalaččaid gihtii.” Samson dajai: “Vurdnot munnje ahte ehpet ieža časkke mu jámas.” 13Sii vástidedje: “Eat mii gotte du. Mii dušše čatnat du ja addit du sin gihtii.” Sii čatne su guvttiin ođđa báttiin ja válde su mielddiset.

14

15,14
3,10+
Go Samson buktojuvvui Lehii, de filistalaččat čurvo ávus go vihke su ovddal. Dalle Hearrá vuoigŋa bođii su badjelii. Báttit maiguin su gieđat ledje čadnojuvvon, boatkanedje dego civnnagan liidneárpput, ja čatnasat gahčče moallun su gieđain. 15Samson áiccai das ásena varas oaloldávtti, válddii dan eatnamis ja časkkii dainna jámas duhát olbmá. 16De son dajai:

“Ásena oaloldávttiin mun časken

ovtta joavkku, guoktenai,

ásena oaloldávttiin

mun godden duhát olbmá.”

17Go son lei dadjan dan, de son bálkestii oaloldávtti. Nu dat báiki gohčoduvvui Oaloldáktedievván.

18Samson goikkai sakka, ja son čuorvvui Hearrái: “Don leat addán dán stuorra vuoittu munnje, bálvaleaddjásat, muhto dál mun goikkan jámas ja gárttan birračuohpakeahtes olbmuid gihtii.” 19Dalle Ipmil luddii gobi mii lei Lehis, ja das golggai čáhci. Samson jugai, ja su eallinnávccat máhcce. Nu dat báiki gohčoduvvui Čuorvuájan, ja dat lea Lehis vel otná beaivvige.

20Samson lei Israela duopmárin guoktelogi jagi dan áigge go filistalaččat ráđđejedje.