Jerusalema kristtalaččaid veahkeheapmi
81
Rom 15,25eč
1 Kor 16,1
Gal 2,10
Vieljažiiddán, mii dáhttut din diehtit man stuorra árpmu Ipmil lea čájehan Makedonia searvegottiide. 2Vaikko áŧestusat leat daid geahččalan, de oskkolaččaid illu lei nu badjelmearálaš ahte sii stuorra geafivuođasge ledje árvasat ja adde valjis attáldagaid. 3
Mun duođaštan ahte sii adde dan maid suite ja velá eambbo, ja eaktodáhtos. 4Sii átno mis njuorrasit beassat searvat veahkehit bassi olbmuid. 5Eaige sii dahkan dušše dan maid mii leimmet sávvan, muhto ovddimustá sii adde Ipmila dáhtu mielde iežaset Hearrái ja maiddái midjiide. 6Danne mii siđaimet Titusa geahččat dan ahte attáldat maid son lei juo álggahan din gaskkas, šattašii ollisin din luhtte. 7
Dishan lea buot nu valjis juohke dáfus: osku, sárdnunmáhttu, diehtu, áŋgirvuohta ja dat ráhkisvuohta mii lea boahtán didjiide mis. De lehket maid dii árvasat go addibehtet dán attáldaga.
8Mun in daja dán danin vai beasan din gohččut, muhto vai beasan geahččalit leago din ráhkisvuohta duohta. Dan mun dagan go muitalan didjiide makkár earáid áŋgirvuohta lea. 9
Fil 2,6č
Dii dovdabehtet Hearrámet Jesus Kristusa árpmu: Vaikko son lei rikkis, de son šattai geafin din dihte, vai dii riggubehtet su geafivuođa bokte.
10
Mun attán didjiide neavvaga, ja dat lea didjiide ávkin, dii geat diibmá álggiidet bargat buriin dáhtuin. 11Ollašuhttet dál dan barggu seammá buriin dáhtuin go álggiidet, návccaideattet mielde. 12
Jos das gii addá, lea buorre dáhttu, de su attáldat adnojuvvo árvvus dan mielde mii sus lea, iige gáibiduvvo dakkár mii sus ii leat. 13Ulbmil ii leat dat ahte go earáid dilli buorrána, de din dilligis hedjona, muhto vai goappašagaid dilli livččii ovttalágán. 14Dál dis lea valljivuohta ja dii veadjibehtet geahpedit doid vádjitvuođa. Nuppe háve doingis lea valljivuohta ja sii vedjet geahpedit din vádjitvuođa, ja nu buohkaid dilli šaddá ovttalágánin. 15
Čállojuvvonhan lea: Das gii lei čoaggán ollu, ii lean liiggás, iige das gii lei čoaggán uhccán, váilon mihkkege.
Titus ja searvegotti áirasat
16Giittus lehkos Ipmilii gii lea boktán Titusa váibmui seammá áŋgirvuođa bargat din ovdii. 17Son guorrasii mu bivdagii, ja son lea nu áŋgir ahte dál son ieš dáhttu vuolgit din lusa. 18Su mielde mii vuolggahit nuppi vielja gean barggu evangeliuma ovddas buot searvegottit rámidit. 19Searvegottit leat dasa lassin maiddái válljen su min mátkeguoibmin doalvut dán ráhkisvuođaattáldaga maid mii leat doaimmahan Hearrá gudnin ja mainna mii dáhttut čájehit iežamet buori dáhtu. 20Mii dáhttut leat vissásat dasa ahte ii oktage beasa moaitit dan mo mii áittardit dán valljugas veahki čoagginbarggu. 21
Rom 12,17
Midjiide lea deaŧalaš dahkat dan mii lea riekta ii dušše Hearrá čalmmiin, muhto maiddái olbmuid čalmmiin. 22Mii vuolggahit sudno mielde velá vieljaineamet muhtuma gii máŋgga áššis ja dávjá lea čájehan iežas áŋgirvuođa ja gii dál lea velá ollu áŋgireabbo, danin go son luohttá didjiide nannosit. 23Titus lea nappo mu bargoguoibmi ja veahkki mu iežan barggus din ovdii, ja dát vieljat leaba searvegotti áirasat, soai leaba Kristusa gudni. 24
Addet dál sidjiide searvegottiid oaidnut duođaštusa iežadet ráhkisvuođas ja čájehehket ahte mii eat leat rámidan din duššás.