Davvisámegiel Biibbal 2019 (Biibbal)
15

Árka buktojuvvo Jerusalemii

151Gonagas huksehii alccesis viesuid Davida gávpogii. Son lágidii maid saji Ipmila árkii ja ceggii dan várás goađi. 2De son dajai: “Duššefal levilaččat ožžot guoddit Ipmila árkka, danne go Hearrá lea válljen sin guoddit dan ja bálvalit su agálaččat.” 3

15,3
13,5
David čohkkii buot israellaččaid Jerusalemii, vai sii vieččašedje ovttas Hearrá árkka dan sadjái maid son lei dasa lágidan. 4David čohkkii maid Arona náli olbmuid ja levilaččaid: 5Kehata sogas čuođiguoktelogi olbmá, oaivámužžan Uriel, 6Merari sogas guoktečuođiguoktelogi olbmá, oaivámužžan Asaja, 7Geršoma sogas čuođigolbmalogi olbmá, oaivámužžan Joel, 8Elisafana sogas guoktečuođi olbmá, oaivámužžan Šemaja, 9Hebrona sogas gávccilogi olbmá, oaivámužžan Eliel, 10ja Ussiela sogas čuođiguoktenuppelohkái olbmá, oaivámužžan Amminadab.

11De David rávkkai báhpain Sadoka ja Ebjatara ja levilaččain Uriela, Asaja, Joela, Šemaja, Eliela ja Amminadaba 12ja dajai sidjiide: “Levilaš bearrašiid oaivámuččat! Basuhehket iežadet ja vieljaideattet ja buktet Hearrá, Israela Ipmila, árkka dan sadjái maid mun lean dasa lágidan. 13Danne go dii ehpet lean min mielde ovddit háve, de Hearrá, min Ipmil, časkkii mis ovtta jámas. Mii eat jearran Hearrás neavvaga, nugo livččiimet galgan.” 14Dalle báhpat ja levilaččat basuhedje iežaset vai besset viežžat Hearrá, Israela Ipmila, árkka. 15

15,15
2 Mos 25,14
4 Mos 4,15
Levilaččat gudde Ipmila árkka olggiid alde guoddinstákkuiguin, nugo Moses lei gohččon Hearrá sáni mielde. 16David gohčui levilaččaid oaivámuččaid bidjat vieljaideaset lávlut ávvulávlagiid ja čuojahit hárppaid, lyraid ja symbálaid. 17Dan doibmii levilaččat válljejedje Hemana, Joela bártni, ja su fulkkiin Asafa, Berekja bártni, ja vel Merari nális Etana, Kušaja bártni. 18Ovttas singuin bálvaledje sin fuolkkit geat ledje nubbin alimusat árvvus: Sakarja, Jaasiel, Šemiramot, Jehiel, Unni, Eliab, Benaja, Maaseja, Mattitja, Eliflehu, Mikneja, Obed-Edom ja Jeiel, uksafávttat. 19Heman, Asaf ja Etan, lávlut, galge dearpat bronsasymbálaid. 20Sakarja, Jaasiel, Šemiramot, Jehiel, Unni, Eliab, Maaseja ja Benaja galge čuojahit hárppa, 21ja Mattitja, Eliflehu, Mikneja, Obed-Edom, Jeiel ja Asasja galge čuojahit lyra. 22Kenanja, levilaš lávluid oaivámuš, galggai jođihit lávluid, danin go son lei čeahppi dasa. 23Berekja ja Elkana leigga fáktan árkka guoras. 24Báhpat Šebanja, Jošafat, Netanel, Amasai, Sakarja, Benaja ja Elieser čuojahedje trompehtaid Ipmila árkka ovddas. Maiddái Obed-Edom ja Jehia leigga fáktan árkka guoras.

25

15,25
2 Sam 6,12–19
Dasto David, Israela vuorrasat ja duháhaoaivámuččat vulge ávvufárus doalvut Hearrá lihtuárkka Obed-Edoma viesus. 26Go levilaččat Ipmila vehkiin guoddigohte Hearrá lihtuárkka, de oaffaruššojuvvojedje čieža vuovssá ja čieža viercca. 27David lei gárvodan fiinna beallemasoalgebiktasa, nu ledje maiddái buot levilaččat geat gudde árkka, lávlut ja Kenanja gii jođihii lávluma. Davidis lei gárvun maiddái beallemasefod. 28Nu oppa Israel vieččai Hearrá lihtuárkka, ja ávvučuorvasat gadje ja dorvvet, trompehtat, symbálat, hárppat ja lyrat čudje. 29Go Hearrá lihtuárka lei boahtimin Davida gávpogii, de Saula nieida Mikal geahčadii láseráigge. Go Mikal oinnii gonagas Davida dánsumin ja njuikkodeamen, de son badjelgeahčai su.

16

Levilaččaid giittuslávlla

161Ipmila árka buktojuvvui dan goahtái maid David lei ceggen dan várás, ja Ipmila muođuid ovddas oaffaruššojuvvojedje boaldinoaffarat ja searvevuođaoaffarat. 2Go David lei geargan oaffaruššamis, de son buressivdnidii álbmoga Hearrá nammii 3ja juogadii buot israellaččaide, sihke olbmáide ja nissoniidda, iešguhtiige láibbi, daddelgáhku ja rusingáhku.

4David bijai muhtun levilaččaid bálvalit Hearrá árkka ovddas ja rámidit, giitit ja máidnut Hearrá, Israela Ipmila. 5Asaf lei sin oaivámuš, ja nubbin su maŋis lei Sakarja. Earát ledje Jaasiel, Šemiramot, Jehiel, Mattitja, Eliab, Benaja, Obed-Edom ja Jeiel geat čuojahedje hárppaid ja lyraid. Asaf dearppai symbálaid, 6ja báhpat Benaja ja Jahasiel bosuiga dorvve. Sii buohkat galge bálvalit álelassii Ipmila lihtuárkka ovddas. 7Dan beaivvi David gohčui Asafa ja su vieljaid vuosttaš geardde máidnut Hearrá ná:

8

16,8
Sál 105,1–15
Giitet Hearrá, rávket su nama,

muitalehket álbmogiidda

su stuorra daguid!

9Lávlot ja čuojahehket su gudnin,

almmuhehket buot su oavdudaguid!

10Máidnot su bassi nama,

illudehkoset dat geat ohcet Hearrá.

11Jerret Hearrá ja su fámu,

ohcet álelassii su muođuid.

12Muitet oavdduid maid son lea dahkan,

su mearkkaid ja su duomuid,

13dii Israela, su bálvaleaddji, mánát,

dii Jakoba bártnit geaid son lea válljen.

14Son lea Hearrá, min Ipmil,

su váldi ollá miehtá eatnama.

15Muitet agálaččat su lihtu,

lohpádusa maid son ásahii duhát čerdii,

16

16,16
1 Mos 15,18
26,3
lihtu maid son dagai Abrahamiin,

váli maid son vuortnui Isakii.

17Son attii dan Jakobii riektin,

Israelii agálaš lihttun:

18“Mun attán dutnje Kanaana eatnama

árbin ja opmodahkan.”

19

16,19
1 Mos 34,30
Go dii leiddet dušše uhca jovkkoš,

hárvát ja vierrásat eatnamis,

20go vádjoleiddet álbmogis álbmogii,

ovtta riikkas nubbái,

21

16,21
1 Mos 12,17
de son ii suovvan geange soardit din.

Din dihte son ráŋggui gonagasaid:

22

16,22
1 Mos 20,7
“Allet duohtat daid

geaid mun lean vuoidan,

allet daga baháid mu profehtaide!”

23

16,23
Sál 96
Lávllo Hearrái, oppa eanan!

Gulahehket su bestojumi beaivvis beaivái!

24Muitalehket álbmogiidda su gudni,

buot álbmogiidda su oavdudaguid!

25

16,25
2 Mos 15,11
Stuoris lea Hearrá, sakka rámidahtti,

hirbmoseabbo go buot ipmilat.

26Buot álbmogiid ipmilat

leat eahpeipmilat,

muhto Hearrá lea dahkan almmi.

27Su birra lea allatvuohta

ja hearvásvuohta,

su bassibáikkis lea fápmu ja illu.

28Gudnejahttet Hearrá,

olmmoščearddat,

gudnejahttet Hearrá fámu,

29gudnejahttet su nama!

Buktet su ovdii oaffarattáldagaid,

loaiddastehket Hearrá ovdii

bassi čikŋabiktasiin!

30Doarggis su muođuid ovddas,

oppa eanan!

Muitalehket álbmogiidda:

Hearrá lea gonagas!

Eanan bissu nanusin, ii dat lihkkas.

31

16,31
Sál 97,1
Illudehkos albmi, ávvudehkos eanan!

Gulahehket buot álbmogiid gullut:

Hearrá lea gonagas!

32Máraidehkos mearra

ja mii dan deavdá,

ávvudehkos eanan

ja buot mii lea dan alde.

33Dalle vuovddi muorat šuvaidit ilus

Hearrá muođuid ovddas,

danin go son boahtá

buktit vuoigatvuođa eatnama ala.

34

16,34
Sál 106,1
Giitet Hearrá! Son lea buorre,

su árbmugasvuohta bistá agálaččat.

35

16,35
Sál 106,47č
Dadjet: Veahket min, bestojumi Ipmil,

viečča min ruoktot ja gájo min

álbmogiid gaskkas,

vai mii beassat máidnut du bassi nama,

ja giitit ja rámidit du.

36Máidnojuvvon lehkos Hearrá,

Israela Ipmil,

agálašvuođas agálašvuhtii.

Oppa álbmot celkkii: “Amen”, ja máinnui Hearrá.

Levilaččaid doaimmat

37David bijai Asafa ja su soga olbmáid doaimmahit álelassii bálvalusa Hearrá lihtuárkka ovddas, nugo lei mearriduvvon guđege beaivái. 38Obed-Edom, Jedutuna bárdni, ja su soga olbmát, oktiibuot guhttalogigávcci, ja Hosa biddjojuvvojedje uksafáktan.

39Báhppa Sadoka ja su soga olbmáid, báhpaid, David mearridii orrut Hearrá goađi luhtte Gibeona oaffarbáikkis. 40

16,40
2 Mos 29,38eč
2 Muit 13,11
Sii galge iđidiid ja eahkediid oaffaruššat Hearrái boaldinoaffariid boaldinoaffaráltára alde, nugo lea čállojuvvon láhkii maid Hearrá lea addán Israelii. 41Ovttas singuin Heman ja Jedutun ja eará namahuvvon lávlut ledje das máidnumin Hearrá: “Su árbmu bistá agálaččat!”

42Heman ja Jedutun aniiga áimmuin maiddái trompehtaid ja symbálaid maid čuojaheaddjit atne, ja vel eará ipmilbálvalusas adnojuvvon čuojanasaid. Jedutuna bártnit ledje uksafáktan.

43Dasto buohkat vulge ruoktot, iešguhtege vissosis, ja maiddái David manai ruktosis buressivdnidit iežas bearraša.

17

Ipmila lohpádus Davidii

171

17,1
2 Sam 7,1–17
Go David lei ássan šloahttasis, de son dajai profehta Natanii: “Mun ásan sederšloahtas, muhto Hearrá lihtuárka lea goađis.” 2Natan vástidii: “Daga fal buot maid áiggut. Ipmil lea duinna.”

3Seammá ija Natanii bođii dát Ipmila sátni: 4Mana ja daja bálvaleaddjásan Davidii ahte Hearrá lea sárdnon ná: Don it oaččo hukset viesu mu ássansadjin. 5

17,5
1 Gon 8,16
Mun in leat ássan viesus dan beaivvi rájes go bukten israellaččaid Egyptas gitta dán beaivvi rádjái, muhto lean vádjolan ja ássan goađis. 6Oppa dan áiggi go lean johtán israellaččaiguin, de mun in leat cealkán oktiige sin oaivámuččain, geaid lean gohččon geahččat iežan álbmoga: “Manin dii ehpet leat huksen munnje sederviesu?” 7
17,7
1 Sam 16,11–13
Almmut dál bálvaleaddjásan Davidii ahte Hearrá, Almmiveagaid Ipmil, lea sárdnon ná: Mun válden du láidomis sávzzaid maŋis álbmogan Israela ráđđejeaddjin. 8Mun lean leamaš duinna juohke sajis gos don leat johtán, ja lean duššadan du ovddas buot vašálaččaid. Mun dagan du nama seammá stuorisin go eatnama stuorráid namat. 9Mun attán álbmogasan Israelii eatnama gosa mun ruohtastuhtán dan ja gos dat beassá ássat muosis. Bahás olbmot eai goassege šat muosehuhte dan eaige soardde dan dego ovdal, 10nugo vel dalle go mun ásahin duopmáriid jođihit álbmogan Israela. Mun vuolidan buot du vašálaččaid. Dál mun, Hearrá, almmuhan dutnje ahte mun huksen dutnje viesu. 11Go du beivviid lohku lea dievvan ja leat mannan áhčiidat lusa, de mun divttán du bártni, muhtuma du iežat nális, šaddat ráđđejeaddjin, ja mun nannen su gonagasvuođa. 12
17,12
28,6č
Son hukse munnje viesu, ja mun nannen su truvnnu agálaš áigái. 13
17,13
1 Sam 15,26
Hebr 1,5
Mun lean su áhčči, ja son lea mu bárdni. Mun in gáidat sus iežan árbmugasvuođa, nugo mun gáidadin dan das gii lei du ovdal. 14
17,14
Luk 1,33
Mun bijan su ráđđet iežan viesu ja riikka agálaččat, ja su truvdnu bissu nanusin agálaš áigái.

Davida giittusrohkos

15Natan muitalii Davidii buot maid Hearrá lei sárdnon ja almmustahttán. 16

17,16
2 Sam 7,18–29
Dalle gonagas David manai rohkadallat Hearrá ja dajai: “Hearrá, mu Ipmil! Mii lean mun, ja mii lea mu sohka, go don leat buktán mu dán rádjái? 17Muhto velá dátge lea dutnje ilá uhccán, Ipmil, ja don leat addán mu sohkii lohpádusaid mat gusket gáiddus áigái. Don, Hearrá Ipmil, leat lokten mu alla árvui. 18Maid vel mun sáhtášin átnut dus dan gudni lassin maid don leat juo addán munnje? Donhan dovddat mu, bálvaleaddját. 19Hearrá, bálvaleaddját dihte ja dan mielde maid leat atnán buorrin, don leat dahkan buot dáid stuorra daguid ja almmuhan daid munnje. 20Hearrá, ii oktage leat du láhkásaš, ii leat Ipmil earret du, dan duođašta buot maid mii leat gullan. 21
17,21
5 Mos 4,7
Ii oktage álbmot eatnama alde leat dego du álbmot Israel, álbmot maid Ipmil ieš lea lonistan iežas álbmogin. Du stuorra ja imašlaš dagut leat dahkan du nama beakkálmassan buot báikkiin. Egyptas don lonistit alccesat álbmoga, ja don ádjet dan ovddas eret eará álbmogiid. 22Don leat dahkan álbmogat Israela iežat álbmogin agálaš áigái, ja don, Hearrá, leat šaddan sin Ipmilin.

23Hearrá, divtte dan sáni maid leat sárdnon mu ja mu soga birra bissut nanusin agálaččat, ja daga nugo leat lohpidan! 24Duođaid, divtte iežat sáni bissut nanusin; dalle du namma gudnejahttojuvvo agálaččat, ja olbmot dadjet: ‘Hearrá, Almmiveagaid Ipmil, lea Israela Ipmil.’ Ja Davida, du bálvaleaddji, sohka bissu nanusin du muođuid ovddas. 25Mu Ipmil, don leat ieš lohpidan hukset munnje viesu. Dan dihte du bálvaleaddji lea arvan rohkadallat du. 26Don, Hearrá, leat Ipmil, ja dál don leat addán bálvaleaddjásat dán stuorra lohpádusa. 27

17,27
2 Sam 7,29
Sál 41,13
Vare don buressivdnidivččet mu soga, vai dat bissu álo du muođuid ovddas! Maid don, Hearrá, buressivdnidat, lea buressivdniduvvon agálaš áigái.”