Markus 8

₁Ton ääigi lijjii vuod čokkânâm ennuv ulmuuh. Ko sist ij lam purrâmâš, te Jeesus kočoi máttááttâspárnáid jieijâs kuuvl já eeđâi: ₂»Mun šallišâm täid ulmuid. Sij láá lamaš muu kulen jo kulmâ peeivi, ige sist lah purrâmâš. ₃Jis mun vuolgâttâm sii pááikán nuuvt et sij láá niälgum, te sij vyeimittuveh määđhist. Maaŋgah sist láá puáttám kukken-uv.» ₄Máttááttâspárnááh ettii sunjin: »Kost kihheen tääbbin ävđinkuávlust puáhtá haahâđ leeibi tái puohâi piemmâmân?» ₅»Kalle leeibi tist láá?» Jeesus koijâdij. Sij västidii: »Čiččâm.»

₆Jeesus kočoi vievâ čokániđ. Talle sun vaaldij taid čiččâm leibid já ceelhij kijttosrukkoos. Tastoo sun tojâlij leeibijd já adelij taid máttááttâspárnáid. Máttááttâspárnááh juohhii taid tastoo aalmugân. ₇Sist lijjii meiddei motomeh uccâ kuálááh. Jeesus sivnedij kuolijd já kočoi faallâđ taid-uv. ₈Ulmuuh purrii kalas, já pasâttâssân pááccám pitáh norrojii čiččâm koorid. ₉Ulmuuh lijjii nyevt neljituhháát.

Ko Jeesus lâi vuolgâttâm sii meddâl, ₁₀te sun forgâ lavkkij máttááttâspárnáiguin kárbás já moonâi Dalmanuta kuávlun.

₁₁Motomeh fariseuseh pottii nágáttâllâđ Jeesusáin. Sij vattii sust meerhâ almeest já tánávt keččâlâddii suu. ₁₂Jeesus šuáhkádij lussâdávt já eeđâi: Mondiet taat suhâpuolvâ váátá meerhâ? Tuođâi: taan suhâpuolvân ij merkkâ adeluu. ₁₃Já sun kuođij sii, lavkkij vuod kárbás já vuolgij jäävri nube pel.

₁₄Máttááttâspárnááh lijjii vájálduttâm väldiđ leeibi fáárun. Sist lâi kárbást ohtâ áinoo leibi. ₁₅Jeesus sáárnui sijjân tuođâlávt: »Anneeđ vaarâin. Váruttiđ fariseusij já Herodes suvre.» ₁₆Mut sij tuše sárnudii koskânis tast, et sist ij lam leibi. ₁₇Jeesus huámmášij tom já eeđâi: »Mondiet tij sárnuvetteđ tast, et tist ij lah leibi? Eppeđ-uv tij valagin ibbeerd, eppeđ-uv addii? Lii-uv tii váimu nuuvt paattum? ₁₈Lááhân tist čalmeh, eppeđ-uv tij uáini? Lááhân tist peeljih, eppeđ-uv tij kuulâ? Já eppeđ-uv tij mušte: ₁₉ko mun juohim taid vittâ leeibi viiđâtuhhát ulmui, te mon kalle koorid tij nuurâid pasâttâsâid? »Kyehtnubáloh», sij västidii. ₂₀Nabai talle ko mun juohim taid čiččâm leibid neljituháttân? Kalle tievâ leibipittákoori tij talle nuurâid?» Sij västidii: »Čiččâm ₂₁Jeesus eeđâi sijjân: »Eppeđ-uv tij valagin ibbeerd?»

₂₂Sij pottii Betsaidan. Tobbeen Jeesus kuuvl puohtui čalmettes almai já ulmuuh tattuu, et Jeesus kuoskâččij sunjin. ₂₃Jeesus vaaldij čalmettes almaa kieđâst já tuálvui suu siijdâ ulguupel. Talle sun čulgâdij almaa čolmijd, piejâi kieđâidis suu oolâ já koijâdij: »Uáináh-uv tun maiden?» ₂₄Almai lehâstij čolmijdis já eeđâi: »Mun uáinám ulmuid – uáinám tego muorâid, mut toh väzzih.» ₂₅Jeesus piejâi uđđâsist kieđâidis almaa čoolmij oolâ, já tääl taat ooinij čielgâsávt puoh. ₂₆Jeesus vuolgâttij suu pááikán já eeđâi: »Ele eisigin moonâ siijdân.»

₂₇Jeesus já suu máttááttâspárnááh vuolgii Filippos Kesarea pirrâs sijdáid. Määđhi alne sun koijâdij máttááttâspárnáin: »Kii mun ulmui mielâst lam?» ₂₈Sij västidii: »Motomij mielâst tun lah Juhánâs Kästee, motomij mielâst Elia, motomij mielâst mottoom profetijn. ₂₉»Nabai tij?» koijâdij Jeesus. »Kii mun tii mielâst lam?» Piättár västidij sunjin: »Tun lah Messias.» ₃₀Jeesus váruttij sii äŋgirávt muštâlmist sust oohtângin.

₃₁Talle Jeesus čielgiiškuođij máttááttâspárnáid, et Ulmuu Alge ferttee killáđ ennuv. Aalmug puárásumoseh, ollâpaapah já laavâmáttáátteijeeh hilgoh suu, já sun koddoo, mut kuulmâ peeivi keččin sun paijaan jämimist. ₃₂Sun sáárnui täst aaibâs rijjâ. Talle Piättár vaaldij suu sierâ já nuttâlškuođij suu. ₃₃Mut sun jorgettij, keejâi máttááttâspárnáid já eeđâi äŋgirávt Piätárân: »Čahhii muu oovdâst, Sáttán! Tuu jurduuh iä lah Imelist, pic ulmust!»

₃₄Jeesus kočoi olmoošjuávhu já máttááttâspárnáidis jieijâs kuuvl já eeđâi sijjân: »Jis kiinii táttu jotteeđ muu maajeeld, te kiäldus sun jieijâs, váldus riistâs já čuávus muu. ₃₅Tastko tot, kote táttu piäluštiđ elimis, lääppit tom, mut kote elimis muu keežild já evangelium keežild lääppit, šadda piäluštiđ tom. ₃₆Mii aavhijd ulmui lii tast, jis sun vuáittá olssis ubâ maailm mut moonât siälus? ₃₇Moin olmooš puáhtá uástiđ siälus maassâd? ₃₈Kote taan oskottes já suddogâs suhâpuolvâ juávhust heeppân muu já muu saanijd, tom šadda Ulmuu Alge hepâniđ, ko sun puátá Eejis kirkkâdvuođâst pase eŋgâlijguin.»