Markus 5

₁Sij pottii nubebel jäävri Gerasa kuávlun. ₂Tállân ko Jeesus lavkkij kárbást, te suu oovdeld poođij hävdikuovđâšmijn almai, kiäst lâi nyeskis jieggâ. ₃Almai aasâi haavdijn, ige kihheen puáhtám innig čoonnâđ ige ävlidiđgin suu. ₄Maŋgii sun lâi čoonnum avlijd sehe kieđâin ete juolgijn, mut sun lâi cuovkkim aavlijd já puátkum paadijd, ige kihheen nahcim haldâšiđ suu. ₅Puoh peeivijd já iijâid sun oroi haavdijn já vaarij alne, huuihij já huškoi jieijâs keđgijguin. ₆Ko sun tääl kukken ooinij Jeesus, te sun poođij kaačân, leggistâđâi enâmân suu oovdân ₇já čuárvui korrâ jienáin: »Maid tun must táátuh, Jeesus, Alemuu Immeel alge? Immeel tiet, ele kivsed muu!» ₈Jeesus uáináh lâi jo koččomin nyeskis jiegâ vyelgiđ almast. ₉»Mii tuu nommâ lii?» Jeesus koijâdij, já finnij vástádâs: »Legioona, tastko mij lep maaŋgâs.» ₁₀Jiegah tattuu já ruhâdellii, et Jeesus ij vuájálitáččij taid ton kuávlust.

₁₁Aldasijn lâi värivielti alne stuorrâ šaheiälu kuátumin. ₁₂Nyeskis jiegah tattuu Jeesusist: »Lyešti mii šaheiälun, tipte mii moonnâđ šovvijd.» ₁₃Sun suovâi taid moonnâđ. Talle nyeskis jiegah vuolgii almast já monnii šovvijd, já iälu ruámustij päävti vuálus jáávrán. Šaveh lijjii nyevt kyehtituhháát, já toh puoh hevvânii.

₁₄Šahekeččeeh vuolgii patârâsân já muštâlii täst puohâst kaavpugist já siijdâin. Ulmuuh pottii keččâđ, mii lâi tábáhtum. ₁₅Sij pottii Jeesus kuuvl já oinii nyeskis jiegâi väividem almaa čokkáámin tobbeen. Almai, kiäst lijjii lamaš legioona verd jiegah, čokkái pihtâseh pajalist já tievâ jiermijnis. Taat suorgâttij sii. ₁₆Toh, kiäh lijjii uáinám puoh, muštâlii sijjân, mii lâi tábáhtum paas jiegâi väividem almai já maht šovvijd lâi keevvâm. ₁₇Talle puohah tátuškuottii, et Jeesus kuáđáččij tom kuávlu.

₁₈Ko Jeesus lavkkij kárbás, te paas jiegâin luovânâm almai táátui, et sun uážuččij pääcciđ suin. ₁₉Jeesus ij toos miettâm pic eeđâi sunjin: »Moonâ páikkásâd huolhijdâd kuuvl já muštâl taan stuorrâ taavoost, mon Hiärrá lii ármustis tunjin porgâm.» ₂₀Almai vuolgij já kullutškuođij Dekapolis kuávlust, maid Jeesus lâi porgâm sunjin. Puohah lijjii hiämáskâm.

₂₁Ko Jeesus lâi maccâm kárbáin nubebel jäävri, te suu kuuvl čokkânii ennuv ulmuuh. Ko sun lâi vala riddoost, ₂₂te toho poođij ohtâ synagoga njunošijn, kiän nommâ lâi Jairos. Ko almai ooinij Jeesus, te sun leggistâđâi Jeesus juolgij oovdân ₂₃já áánui: »Puáđi, muu nieidâ lii jämimin. Piejâ kieđâd suu oolâ, te sun puárrán ige jäämi.» ₂₄Jeesus vuolgij almaa fáárun, já stuorrâ olmoošjuávkku čuávui suu já pokkiidâđâi suu pirrâ.

₂₅Tobbeen lâi meiddei nissoon, kiäm kyehtnubáloh ihheed lâi väividâm vorrâkulgâttâs. ₂₆Sun lâi čuuvtij kierdâm maaŋgâi tuáhtárij kieđâin já kulâttâm ubâ omâduvvâs. Sun ij lam finnim maiden iišijd, pic suu tile lâi huánánâm. ₂₇Sun lâi kuullâm Jeesusist, já tääl sun olmoošjuávhu siste poođij Jeesus tuáhá já kuoskâttij Jeesus kiessâmmááccuhân. ₂₈Nissoon uáináh jurdâččij: »Jis mun peesâm kuoskâđgin suu kiessâmmááccuhân, te mun puáránâm.» ₂₉Siämmást vorrâkulgâttâs josijdui já sun tuubdâi ropâstis, et lâi puáránâm vääivist.

₃₀Jeesus tuubdâi tállân, et sust lâi vuálgám vyeimi. Sun jorgettij olmoošjuávhust já koijâdij: »Kii kuoskâi muu pihtâsáid?» ₃₁Máttááttâspárnááh ettii sunjin: »Tun uáináh, maggaar pokkiidâttâm kaskoo tun lah, já koijâdah: kii kuoskâi munjin? ₃₂Mut Jeesus kejâdij pirrâsis, vâi uáináččij tom, kote nuuvt lâi porgâm. ₃₃Nissoon tuárgistij paaloost, tastko sun tieđij, mii sunjin lâi tábáhtum. Sun poođij Jeesus oovdân, leggistâđâi enâmân já muštâlij sunjin puoh. ₃₄Jeesus eeđâi sunjin: »Nieidâm, oskod lii pyeredâm tuu. Moonâ ráávhust, tun lah peessâm väivistâd.»

₃₅Ko Jeesus vala sáárnui, te puohtui synagoga njunošalmaa pääihist sääni: »Tuu nieidâ jaamij jo, mondiet tun innig väividiččih máttáátteijee.» ₃₆Ko Jeesus kuulâi taam, te sun eeđâi njunošalmai: »Ele poolâ, pic osko.» ₃₇Sun ij tiptám kiämmán iärrás puáttiđ fárusis ko Piättár já Jáákkup sehe Juhánâs, Jáákkup viiljâ. ₃₈Sij pottii synagoga njunošalmaa pááikán, já Jeesus ooinij larmâdeijee olmoošjuávhu já kuulâi ulmuid čiärumin já väidimin korrâ jienáin. ₃₉Sun moonâi siisâ já eeđâi: »Mondiet tij tánávt larmâdvetteđ já čiäruvetteđ? Ij pärni lah jáámmám, pic sun uáđá.» ₄₀Ulmuuh povvâstii Jeesusân. Mut sun vuájálitij puohâid olgos, vaaldij fárusis párnáá eeji já eeni já taid, kiäh lijjii suu fáárust já moonâi viistán, kost pärni lâi. ₄₁Sun vaaldij párnáá kieđâst já eeđâi sunjin: »Talita kuum!» ₄₂Tállân nieidâ pajanij já väzzilij; sun lâi kyehtnubálovihásâš. Puohah lijjii čuuvtij hiämáskâm. ₄₃Jeesus kieldij äŋgirávt sii muštâlmist täst kiässán. Nieidân sun kočoi faallâđ purrâmâš.