Markus 2

₁Mottoom ääigi keččin Jeesus moonâi oppeet Kapernaumân. Ko ulmuuh kullii, et sun lii pääihist, ₂te ulmuuh čokkânii nuuvt ennuv, et puohah iä šiettâm uksnjáálmángin. Jeesus kulluuttij sijjân sääni. ₃Suu kuuvl lâi puohtuumin vuoččum olmooš. Pyeccee kyeddimin lijjii nelji almaa, ₄kiäh iä olmoošpokkiidâtmist kuittâg peessâm pyehtiđ suu Jeesus oovdân. Talle sij lyevvejii uási káátust togo, kogo Jeesus lâi, já ko káttu lâi lekkum, te sij luoštii rääigi mield vuálus kyeddimmato, mon alne vuoččum almai viällái. ₅Ko Jeesus ooinij sii osko, te sun eeđâi vuoččum almai: »Algam, tuu sudoh adeluvvojeh addâgâs.»

₆Mut tobbeen čokkájii meiddei motomeh laavâmáttáátteijeeh, já sij jurdâččii jiečânis: ₇»Maht sun tienuuvt sárnu? Sun peelhit Immeel. Kii eres ko Immeel puáhtá adeliđ suddoid addâgâs?» ₈Jeesus tuubdâi tállân jiegâstis, maid sij jurdâččii, já eeđâi sijjân: »Maht tij tyegárijd juurdâšvetteđ? ₉Kuábáš lii älkkeb, ettâđ vuoččum almai: ’Tuu sudoh adeluvvojeh addâgâs’ vâi ettâđ: ’Paijaan, vääldi saajaad já vääzi’? ₁₀Mut et tij tiäđáččijd, et Ulmuu Algeest lii väldi adeliđ eennâm alne suddoid addâgâs» – sun sáárnui tääl vuoččum almai – ₁₁»čyežžil, vääldi seŋgâd já moonâ páikkásâd.» ₁₂Talle almai tállân pajanij, vaaldij saajees já vaazij meddâl puohâi uáinidijn. Puohah lijjii täst hiämáskâm, alestii Immeel já ettii: »Tággáár mij ep lah kuássin uáinám.»

₁₃Jeesus vuolgij talle vuod jäävri riidon. Ubâ olmoošjuávkku poođij suu maajeeld, já sun máttááttij sii. ₁₄Ko sun juuđij tullisajattuv lappâd, te sun ooinij Leevi, Alfeus alge, čokkáámin tobbeen. Jeesus eeđâi sunjin: »Čuávu muu», já sun čyežžilij já vuolgij čuávvuđ Jeesus.

₁₅Jeesus lâi talle puurâdmin Leevi pääihist. Maaŋgah publikaaneh já eres suddogâsah purâdii Jeesusáin já suu máttááttâspárnáiguin, tastko sij lijjii ennuv suu čuávvoi juávhust. ₁₆Ko fariseusáid kullee laavâmáttáátteijeeh oinii Jeesus puurâdmin suddogâsâi já publikaanij siärváduvvâst, te sij ettii suu máttááttâspárnáid: »Maht sun puurâd oovtâst publikaanijguin já eres suddogâsâiguin!» ₁₇Jeesus kuulâi tom já eeđâi: »Iä tiervâseh taarbâš pyeredeijee, pic pyecceeh. Jiem mun lah puáttám koččođ hurskáid, pic suddogâsâid.»

₁₈Juhánâs máttááttâspárnááh já fariseuseh vástudii. Motomeh pottii koijâdiđ Jeesusist: »Mondiet tuu máttááttâspárnááh iä vástud, ko kerd Juhánâs máttááttâspárnááh já fariseusij máttááttâspárnááh vástudeh?» ₁₉Jeesus västidij: »Iähân hejâkyesih pyevti vástudiđ talle ko irge lii vala siiguin! Nuuvt kuhháá ko irge lii sii kulen, te sij iä pyevti vástudiđ. ₂₀Vala puátá tot-uv äigi, kuás irge váldoo meddâl, já talle, ton peeivi sij vástudeh. ₂₁Ij kihheen kuáru tuoppiihánnáá kággást tuovŋâs puáris kiessâmmááccuhân. Tallehân puáris piivtâs rottâs uđđâ tuovŋâs paaldâst, já räigi šadda vala viärráábin. ₂₂Ige kihheen liäšku uđđâ viini puáris viinisehháid. Tallehân viini cyevkkee taid já sehe viini ete viiniseehah pillâšuveh. Ij, uđđâ viini kalga liäškuđ uđđâ viinisehháid.»

₂₃Jeesus juuđij motomin sabattin valjepiäldu roobdâ, já suu máttááttâspárnááh jođedijnis nurâškuottii jiveooivijd. ₂₄Talle fariseuseh ettii sunjin: »Keejâ tääl! Mondiet tuu máttááttâspárnááh pargeh tagarijd, maid sabattin ij lah lope porgâđ?» ₂₅Mut Jeesus västidij sijjân: »Eppeđ-uv tij lah kuássin luuhâm, maid Taavvid poorgâi, ko sun já suu almaah lijjii niälgumin, ige sist lamaš purrâmâš? ₂₆Sun moonâi, ko Abjatar lâi alemuu pappân, Immeel viistán já vaaldij uhreleeibijd, puurâi já adelij almaidis-uv, veik toi puurrâm lâi loválâš tuše pappáid.» ₂₇Já Jeesus eeđâi sijjân: »Sabbaat lii ulmuu várás ige olmooš sabbaat várás. ₂₈Nuuvtpa Ulmuu Alge lii meiddei sabbaat hiärrá.»