1Ko sabbaat lâi moonnâm, Magdala Máárjá, Jáákkup enni Máárjá já Salome ostii opsâoljo, ko sij aiguu moonnâđ vuoidâđ Jeesus. 2Čuávuváá peeivi sabbaat maŋa tooláá iđedist, ko peivi lâi pajanâm, sij vuolgii häävdi kuuvl. 3Määđhist nisoneh savâstellii koskânis: »Kii išedičij mii já jurâttičij keeđgi hävdikuovđâšm uuvsâ oovdâst?» 4Mut ko sij pottii tohon, te sij huámmášii, et keđgi lâi jurâttum meddâl; tot lâi hirmâd stuorrâ keđgi.
5Ko nisoneh monnii háávdán siisâ, te sij oinii uálgispeln čokkáámin nuorâ almaa, kiäst lijjii pajalist vielgis pihtâseh. Sij suorgânii. 6Mut nuorâ almai eeđâi: »Elleđ suorgân. Tij ucâvetteđ Jeesus Nasaretlii, kote lâi riistânnävlejum. Sun lii pajanâm jämimist, ij sun lah tääbbin. Tuođee lii saje, kuus sun pieijui. 7Moonnâđ tääl ettâđ suu máttááttâspárnáid, meiddei Piätárân: ’Sun mana tii oovdeld Galilean. Tobbeen tij uáinivetteđ suu, tego sun jieš tijjân eeđâi.’»
8Ko nisoneh pottii olgos, te sij patârii häävdi kulen tuárgistin, tastko sij lijjii suorgânâm. Sij iä sárnum maiden kiässán, tastko sij pollii.
Jeesus almostuvá aldemuidis
[9Ko Jeesus lâi tooláá iđedist čuávuváá peeivi sabbaat maŋa pajanâm jämimist, sun almostui vistig Magdala Máárján, kiäst sun lâi vuájálittám čiččâm paas jieggâd. 10Máárjá vuolgij tobbeen já tuálvui sääni Jeesus siärváláid, kiäh čierruu murrâšist. 11Sij iä kuittâg oskom ko kullii, et Jeesus eelij já et Máárjá lâi uáinám suu.
12Ton maŋa Jeesus almostui omâs häämist kuáhtásân sist, ko suoi láin jotemin meddâl kaavpugist. 13Meiddei suoi moonáin tuálvuđ iärrásáid sääni, mut ij kihheen oskom sunnuugin.
14Viijmâg Jeesus almostui meiddei oovtnubálov máttááttâspárnáásis, ko sij lijjii puurâdmin. Sun laaitij sii epiosko já sii vááimu korâsvuođâ, ko sij iä lamaš oskom taid, kiäh lijjii uáinám suu pajaspajanem maŋa. 15Sun eeđâi sijjân: »Moonnâđ maailm jyehi kuávlun já kulluuttiđ ilosaavâ puoh toid, kiäh láá sivnedum. 16Kote tom osko já kástoo, piäluštuvvoo. Tot kote ij osko, tuommiidât káđuttâsân. 17Já taah meerhah čuávuh sii, kiäh oskoh: Muu noomâst sij vuájáliteh paas jiegâid. Sij sárnuh vieres kielâiguin. 18Sij tuáppuh kieđâiguin kuovdijd, já veik sij juheh koddee miirhâ, tot ij vahâgit sii. Sij piejih kieđâidis pyeccei oolâ, já taah puáráneh.»
19Ko Hiärrá Jeesus lâi sárnum sijjân taam, sun valdui pajas aalman já sun čokánij Immeel uálgispel. 20Máttááttâspárnááh vuolgii já särnidii jyehi kuávlust. Hiärrá tooimâi siiguin já nonnij sääni merhâiguin.]
