Värisärni
Avdâgâsânjulâstus
1Ko Jeesus ooinij aalmugjuávhuid, te sun kuárŋui vääri oolâ. Sun čokánij, já máttááttâspárnááh pottii suu kuuvl. 2Talle sun sárnuškuođij já máttááttij sii näävt:
3»Avdâgâsah láá jiegâstis kievhih,
tastko sii lii oolmij väldikodde.
4Avdâgâsah murâšliih:
sij uážžuh lohđuttâs.
5Avdâgâsah sijvuuh:
sij ärbejeh eennâm.
6Avdâgâsah toh, kiäin lii vanhurskesvuođâ nelgi já koško:
sij kalaneh.
7Avdâgâsah toh, kiäh iärásijd ärmitteh:
sij ärmittuvvojeh.
8Avdâgâsah putesváimusiih:
sij uážžuh uáiniđ Immeel.
9Avdâgâsah ráávhu rähteeh:
sij kočoduvvojeh Immeel pärnin.
10Avdâgâsah láá toh, kiäh vanhurskesvuođâ tiet váinuduvvojeh:
sii lii oolmij väldikodde.
11»Avdâgâsah leppeđ tij, ko ulmuuh muu tiet pilkkedeh já váinudeh tii já kieleestmáin sárnuh tist puoh paaid. 12Ilodiđ já ávudiđ, tastko pälkki, mon tij almeest uážžuvetteđ, lii styeres. Siämmáánáál váinuduvvojii profeteh-uv, kiäh ellii ovdil tii.
Sälttin já čuovvân maailmist
13»Tij leppeđ eennâm sältti. Mut jis sältti ij innig časke, moin tom talle uážžu sálttán? Tot ij innig tuhhii moossân: tot leggistuvvoo meddâl, já ulmuuh tyelmih tom.
14»Tij leppeđ maailm čuovâ. Ij kaavpug pyevti leđe čiehhum, jis tot lii paijeen vääri alne. 15Ige lamppu, ko tot cokkiittuvvoo, pieijuu nisumito vuálá, mut laampujuálgán. Tast tot čuává puohháid, kiäh láá visteest. 16Nuuvt čuávus tii-uv čuovâ ulmuid, vâi sij uáináččii tii puorijd pargoid já alestiččii tii Eeji, kote lii oolmijn.
Jeesus já laahâ
17»Elleđ juurdâš, et mun lam puáttám laavâ teikâ profetijd tuolmâđ. Jiem mun lah puáttám tuolmâđ mut tevdiđ. 18Tuođâi: laavâst ij lappuu ohtâgin puustav, ij ucemuskin säärgis, ovdilgo alme já eennâm láppojeh, ovdilgo puoh lii tábáhtum. 19Tot, kote kuáđá laavâst meddâl oovtâ-uv pákkum, veik puoh ucemuu-uv, já tienuuvt máttát, koččoo oolmij väldikoddeest ucemussân. Mut tot, kote nuávdit laavâ já nuuvt máttát, koččoo oolmij väldikoddeest styeresin. 20Mun eeđâm tijjân: jis tij eppeđ nuávdit Immeel táátu ennuv pyerebeht ko laavâmáttáátteijeeh teikâ fariseuseh, te tij eppeđ peesâ oolmij väldikoodán.
Vaje já riijdo kuáttá
21»Tijjân lii máttááttum taat eijijd adelum pákkum: ’Ele kode.’ Tot, kote koddá, lii ánsášâm tuámu. 22Mut mun eeđâm tijjân: juáháš, kote suttá viiljâs oolâ, lii ánsášâm vuoigâdvuođâ tuámu. Siämmáánáál juáháš, kote iätá viljâsis ’Tun tuávkki’, lii ánsášâm Stuorrâ rääđi tuámu, já tot, kii iätá: ’Tun jollâ’, lii ánsášâm helvit tuulâ.
23»Jis te lah tuálvumin uhrelaahjijd álttárân já tast muštáh, et viljâstâd lii miinii tuu vuástá, 24te kyeđe lahjijdâd álttár oovdân já ele vistig sopâmin viljâinâd. Moonâ talle esken adeliđ lahjijdâd.
25»Mieđâ sooppâđ rijdokuoimijnâd jo talle ko vala lah suin jotemin vuoigâdvuotân. Mudoi sun sáttá adeliđ tuu tuámárân já tuámmár vaahtân, já nuuvt tun šoodah kiddâgâsân. 26Osko muu: tobbeen tun jieh peesâ ovdilgo lah máksám majemuu-uv šlaanti.
Näimirikkoos kuáttá
27»Tijjân lii máttááttum taat pákkum: ’Ele toovâ näimirikkoos.’ 28Mut mun eeđâm tijjân: juáháš, kote kiäččá nisonân nuuvt, et anestuvá suu, lii jo váimustis toohâm näimirikkoos suin. 29Jis uálgisčaalmad viettâl tuu, te kiškeet tom já leggist meddâl. Liihân tunjin pyereeb, et monâttah tuše oovtâ uási jieijâd rumâšist ko et ubâ rumâšâd kárttá helvitân. 30Já jis uálgiskiettâd viettâl tuu, te časke tom rasta já leggist meddâl. Liihân tunjin pyereeb, et monâttah tuše oovtâ jeessân ko et ubâ rumâšâd kárttá helvitân.
31»Lii meiddei máttááttum, et jis almai haalijd iärániđ kálgustis, te sun kalga adeliđ taas iärukirje. 32Mut mun eeđâm tijjân: juáháš, kote hilgo káálgus eres suujâ ko huárástem tiet, vuájá suu näimirikosân. Já tot meiddei taha näimirikkoos, kote náájá nissoon, kiäm taan käälis lii hilgom.
Vuárnum kuáttá
33»Vala tijjân láá máttááttum taah eijijd adelum pákkumeh: ’Ele vuárnu puástud’ já ’teevdi tom, maid lah Hiärán vuárnáin vuárnum’. 34Mut mun eeđâm tijjân: Elleđ ollágin vuárnu. Elleđ alme peht, tastko tot lii Immeel väldičokkámsaje, 35elleđ eennâm peht, tastko tot lii suu juolgij lavkkimsaje, elleđge Jerusalem peht, tastko tot lii stuorrâ kunâgâs kaavpug. 36Elege vuárnu uáivádgin peht, tastko tun jieh pyevti mutteđ oovtâgin vuoptâ čappâdin jiehke vielgâdin. 37Ko tij mieđeetvetteđ, te ettâđ tuše: ’Kale’, já ko kieldivetteđ, te ettâđ: ’Ij’. Mii toos lasettuvvoo, lii paast.
Rähistiđ tii vajalijd
38»Tijjân lii máttááttum: ’Čalme čalmeest, pääni päänist’. 39Mut mun eeđâm tijjân: elleđ vuástálist paa. Jis kiinii toškâl tuu uálgisnierân, te jurgâl sunjin čižetnierâd-uv. 40Jis kiinii haalijd tuu ášáskuttiđ já váldá tuu liškepääiđi, te adde sunjin kiessâmmááccuhâd-uv. 41Jis kiinii váátá tuu miäldásis virstá máátkán, te jođe suin kyehti. 42Adde toos, kii tust áánu, elege jorgeet siälgád toos, kote haalijd lovniđ tust.
43»Tijjân lii máttááttum: ’Räähist aldemusâd já vaijeed vajalâšâd’. 44Mut mun eeđâm tijjân: rähistiđ vajalijdâd já ruhâdâllâđ jieijâd váinudeijei peeleest, 45vâi tij liččijd almalii Iäččád párnááh. Sun tiptá peeivis pajaniđ nuuvt puorij ko paai-uv oolâ já tiptá arveđ nuuvt vanhurskái ko immeelmettumij oolâ. 46Jis tij räähistvetteđ taid, kiäh tii rähisteh, te maid paalhijd tij áánsášvetteđ tast? Iä-uv publikaaneh-uv poorgâ siämmáánáál? 47Jis tij tiervâtvetteđ tuše tii ustevijd, mii eromâšijd tast lii? Iä-uv pähineh-uv poorgâ tienuuvt? 48Tij kolgâvetteđ leđe olláseh nuuvtko tii almalaš Eeči lii oles.
