Matteus 28

₁Ko sabbaat lâi nuuhâm, oho vuosmuu peeivi čuovvândijn, poođijn Magdala Máárjá já tot nubbe Máárjá keččâđ häävdi. ₂Fakkist eennâm tuárgistškuođij, tastko Hiärá eŋgâl luáštádâđâi almeest. Sun poođij häävdi kuuvl, vierâttij keeđgi meddâl já čokánij ton oolâ. ₃Sun lâi šeerrâd tego aldâkkâs já suu pihtâseh lijjii vielgâdeh tego muotâ. ₄Vaavtah suorgânii sust nuuvt čuuvtij, et tuárgistškuottii já koččii enâmân tego jämmeeh.

₅Eŋgâl jorgettij nissoonkuáhtá piälán já eeđâi: Ellee tuoi poolâ! Mun tiäđâm, et tuoi ucâvettee riistânnävlejum Jeesus. ₆Ij sun lah tääbbin. Sun lii pajanâm jämimist, tego sun jieš eeđâi. Puáttee keččâđ, tyest lii saje, kogo sun viällái. ₇Mannee huápust ettâđ suu máttááttâspárnáid: ’Sun lii pajanâm jämimist. Sun mana tii oovdeld Galilean, tobbeen tij uáinivetteđ suu.’ Taat lâi muu saahâ tunnui.» ₈Nissoonkyevtis vuolgijn tállân häävdi kulen, siämmást paloin já iloin, já toomáin tuálvuđ sääni Jeesus máttááttâspárnáid.

₉Mut fakkist Jeesus poođij sunnuu oovdeld já tiervâttij sunnuu. Suoi moonáin suu kuuvl, saloin suu juolgijd já komerdáin suu. ₁₀Talle Jeesus eeđâi sunnui: »Ellee poolâ. Mannee ettâđ muu viljáid, et sij kalgeh vyelgiđ Galilean. Tobbeen sij uáinih muu.»

₁₁Ko nissoonkyevtis láin määđhi alne, motomeh vaavtah monnii kaavpugân já muštâlii ollâpappáid puoh, mii lâi tábáhtum. ₁₂Talle taah čokkânii ráđádâllâđ ohtân puárásijguin já meridii adeliđ suátialmaid stuorrâ ruttâmere. ₁₃Sij ettii suátialmaid: »Ettâđ, et suu máttááttâspárnááh pottii iho tii uáđidijn já suáládii suu. ₁₄Já jis taat puátá eennâmhiärá peljijd, te mij kale tutâdep suu já ornip nuuvt et tijjân iä šoodâ vädisvuođah.» ₁₅Suáldátteh valdii ruuđâid já porgii nuuvtko sijjân lâi ettum. Sii saahâ lii juudalij koskâvuođâst levâttum tai peeivij räi.

₁₆Puoh ohtnubáloh máttááttâspärnid vuolgii Galilean já korŋuu vääri oolâ, kuus Jeesus lâi koččom sii moonnâđ. ₁₇Ko sij oinii suu, sij komerdii suu, mut motomeh liijká epidii. ₁₈Jeesus poođij sii kuuvl já sáárnui sijjân näävt: »Munjin lii adelum puoh väldi almeest já eennâm alne. ₁₉Moonnâđ tääl já toohâđ puoh almugijd muu máttááttâspärnin: kästiđ sii Eeji já Alge já Pase Jiegâ noomân ₂₀já máttááttiđ sii nuávdittiđ puoh, maid mun lam koččom tii nuávdittiđ. Já keejâ, mun lam tiiguin jyehi peeivi maailm loopâ räi.»