Luukas 16

₁Jeesus sáárnui talle máttááttâspárnáidis: »Te lâi riges almai, kiäst lâi tálutuállee. Sunjin kuoddâlii, et tálutuállee tuhledij suu omâduv. ₂Almai kočoi suu puáttiđ jieijâs kuuvl já eeđâi: ’Maid mun tust kuulâm! Toovâ lovo jieijâd tooimâin, muu tálutuálu tun jieh innig tipšo.’ ₃Almai smietâi: ’Maid mun tääl poorgâm? Iššeed piäjá muu meddâl tálutuálu tipšoo tooimâst. Kuáivuđ mun jiem vaje, kerjidiđ jiem kehtid. ₄– Täälba mun tiäđám! Mun orniim nuuvt, et eres ulmuuh väldih muu tálusis, ko mun kaartâm vyelgij pargosajestân.’ ₅Sun kočoi išedis viälgálijd vuáruttuvâi jieijâs kuuvl. ’Mon ennuv tun lah velgus muu išedân?’ sun koijâdij vuosmuust. ₆’Čyeti litted oljo’, sun västidij. Tálutuálu tipšoo eeđâi: ’Taa lii velgikirjáád, čokkáán já merkkii huápust vittâlov.’ ₇Talle sun koijâdij nubbeest: ’Naba tun, mon ennuv tun lah velgus?’ Viälgálâš västidij: ’Čyeti farppâlid niisu.’ Tálutuálu tipšoo eeđâi: ’Taa lii velgikirjáád, merkkii kähcilov.’»

₈Já Hiärrá rammui epirehelâš tálutuálu tipšoo vijsesvuođâ. Sun eeđâi:

»Taan maailm párnááh lättejeh nubijdis kuáttá vijsásubbooht ko čuovâ párnááh. ₉Mun eeđâm-uv tijjân: skappuđ puásturigesvuođáin ustevijd, kiäh väldih tii avalijd aassâmviäsoid, ko tuot rigesvuotâ ij innig lah.

₁₀»Tot kote lii ucemuust lyetittettee, tot lii lyetittettee stuárrást-uv, já kote lii ucemuust epirehelâš, tot lii epirehelâš stuárrást-uv. ₁₁Jis tij eppeđ lyetittetteht tipšo puásturigesvuođâ, kii osko tijjân tuođâlâš rigesvuođâ? ₁₂Já jis tij eppeđ lyetittitteht tipšo nube ulmuu omâduv, kii tijjân ohtii addel tom, mii lii tii uámi? ₁₃Ij ohtâgin palvâleijee pyevti palvâliđ kyevti hiärá. Jis sun nube räähist, sun vaijeed nube; Jis sun lii servâm nuubán, háálbáš nube. Tij eppeđ pyevti palvâliđ Immeel já mammona.»

₁₄Fariseuseh kullii puoh taam. Sij lijjii ruttâänhiseh, já nuuvtpa sij pilkkedii Jeesus.

₁₅Jeesus eeđâi sijjân:

»Ulmuu oovdâst te leppeđ maka hurskáh, mut Immeel tobdá tii vááimuid. Tot, mii lii ulmui čoolmij mielâst árvulâš, lii Imelân ilgâd.

₁₆»Laavâ já profetij äigi piištij Juhánâs räi. Ton rääjist lii kulluuttum pyeri saahâ Immeel väldikoddeest, já váttoo, et juáháš kalga puáttiđ toho. ₁₇Mut laavâst ij lappuu säärgiskin, ovdij jo láppojeh alme já eennâm. ₁₈Juáháš, kote hilgo káálgus já náájá nubbijn, taha näimirikkoos, já siämmáánáál taha näimirikkoos tot, kote náájá kállás hilgom nissoon.

₁₉»Te lâi riges almai. Suu káárvuh lijjii purppurist já fijnásumos piellivâsâst, já peeivist piäiván suu eellim lâi pištevâš oovtmanolâš luksus já juhle. ₂₀Mut suu verejáá piällást viällái kievhis Lasarus, kote lâi tievâ pohhuin. ₂₁Kievhi ličij halijdâm puurrâđ niälgásis taid purrâmâšmuáluid, moh riggá peevdist kočâdii. Pennuuh-uv pottii toos já njuolluu suu pohhuid.

₂₂»Talle kievhi jaamij, já eŋgâleh tolvuu suu Áábráhâm haaldun. Riges-uv jaamij, já suu hävdidii. ₂₃Ko sun jämmeiááimu toskeest luptij kejâstuvâs, sun ooinij kukken Áábráhâm já Lasarus suu radded vuástá. ₂₄Talle sun huuihij: ’Eeči Áábráhâm, äärmit muu! Vuolgât Lasarus teehi, vâi sun njuoskâdičij suormâkeejis čääsist já čuáskuttičij muu njuohčâm. Taan tuulâst lii kaavhâd leđe.’ ₂₅Mut Áábráhâm eeđâi: ’Mušte algaam, et tun ožžuh elimâd ääigi šiev uási, Lasarus hyenes uási. Tääl sun uážžu tääbbin vaivijdis lohđuttâs, mut tun uážuh killáđ toskeest. ₂₆Já ton lasseen munnuu kooskâst lii jieŋâlis paijeelpesâmettum ävži, nuuvt et tääbbin ij kihheen pyevti puáttiđ tii kuuvl, veikkâ halijdičij-uv, ige tobbeen peesâ kihheen äävži paijeel teehi.’ ₂₇Riges almai eeđâi: ’Eeči, mun piivdám, vuolgât suu talle muu vaanhimij táálun. ₂₈Must láá vittâ viiljâ – sun kolgâččij váruttiđ sii, amas sij-uv karttâđ taan killáámuš sajan.’ ₂₉Áábráhâm västidij: ’Sist láá Mooses já profeteh. Kulos sii.’ ₃₀’Ij, eeči Áábráhâm’, almai eeđâi, ’mut jis kiinii jaamišij juávhust monâččij sii kuuvl, sij tovâččii puárádâs’. ₃₁Mut Áábráhâm eeđâi sunjin: ’Jis sij iä kuldâl Mooses já profetijd, ij sii finnii oskođ, veikkâ kiinii pajaničij-uv jämimist.’»