Johannes 8

₃Te fakkist laavâmáttáátteijeeh já fariseuseh puohtii ton sajan nissoon, kote lâi kavnâdâttâm näimitile rikkomist. Sij asâttii suu Jeesus oovdân ₄já ettii: »Máttáátteijee, taat nissoon kavnâttâđâi näimitile rikkomist. ₅Mooses lii laavâst adelâm miärádâs, et tágárijd kalga keđgiđ. Maid tun eeđah?» ₆Sij sarnuu näävt, vâi peesih keččâlâddâđ Jeesus já finnejeh toin naalijn aagâ ášáskuttiđ suu.

Mut Jeesus komerdâdâi já čaalij suormâinis enâmân. ₇Ko sij vuárnuttii sust vástádâs, sun čyežžilij já eeđâi: »Tot tist, kote ij lah suddodâm, leggistus vuosmuu keeđgi.» ₈Sun komerdui oppeet já čaalij enâmân. ₉Ko sij lijjii kuullâm Jeesus saanijd, sij monâdii meddâl, puárásumoseh vistig. Aalmug koskâvuotân passijn tuše Jeesus já nissoon. ₁₀Jeesus pajedij kejâstuvâs já koijâdij: »Nissoon, kost toh puohah láá? Ij-uv kihheen tuommim tuu?» ₁₁»Ij, hiärrá», nissoon västidij. Jeesus eeđâi: »Jiem tuommii mungin. Moonâ, elege innig suddod.»]

₁₂Jeesus sáárnui vuod aalmugân já eeđâi: »Mun lam maailm čuovâ. Tot, kote čuávu muu, ij jođe sevŋâdâsâst, mut sust lii eellim čuovâ.»

₁₃Fariseuseh ettii sunjin: »Tun jieš tuođâštah jieijâd peeleest, ij tuu tuođâštus lah tohálâš.» ₁₄Jeesus västidij: »Veikkâ mun tuođâštâm-uv alnestân, muu tuođâštus lii tohálâš, tastko mun tiäđám, kost mun lam puáttám já kuus mun moonâm. Mut tij eppeđ tieđe, kost mun puáđám já kuus mun moonâm. ₁₅Tij tuommiivetteđ nuuvt ko ulmuuh tyemmejeh, mut mun jiem tuommii kiämmán. ₁₆Já jis mun tuommiim-uv, te muu tuámu lii tohálâš, tastko mun jiem lah ohtuu. Muu Eeči, kote lii muu vuolgâttâm, lii muin. ₁₇Iättoohân tii laavâst-uv, et kyevti viittân tuođâštus lii tohálâš. ₁₈Mun tuođâštâm alnestân, já must tuođâšt meid Eeči, kote lii muu vuolgâttâm.» ₁₉»Kost tuu eeči lii?» sij koijâdii. Jeesus västidij: »Tij eppeđ tuubdâ muu, eppeđge Iäččán. Jis tij tubdâččijd muu, te tubdâččijd meid Iäččán.»

₂₀Täid saanijd sun sáárnui, ko sun máttááttij aalmug temppâlkuávlust uhrečuhe kulen. Kihheen ij váldám suu kiddâ, tastko suu äigi ij lamaš vala puáttám.

₂₁Sárnudijnis oppeet aalmugân Jeesus eeđâi: »Mun moonâm meddâl. Talle tij ucâvetteđ muu, mut jämivetteđ sudoidâd. Kuus mun moonâm, toho eppeđ tij peesâ.» ₂₂Juudaliih imâštellii: »Ááiguš-uv sun koddeđ jieijâs, ko sun nievt iätá: ’Kuus mun moonâm, toho eppeđ tij peesâ’?» ₂₃Jeesus eeđâi sijjân: »Tij leppeđ vuálgám vyellin, mun puáđám paijeen. Tij kulâvetteđ taan maailmân, mut mun jiem taan maailmân kuulâ. ₂₄Tondiet mun eeđâm tijjân, et tij jämivetteđ jieijâd suddoid. Jis eppeđ osko, et mun lam tot kote mun lam, tij jämivetteđ jieijâd suddoid.» ₂₅»Kii talle tun lah?» sij koijâdii. Jeesus västidij: »Manen mun ubâ sáárnumgin tijjân? ₂₆Must ličij ennuv ettâmnáál tist já ennuv tii ääših tuommimnáál. Mut muu vuolgâtteijee sárnu tuođâ, já mun tuše almottâm maailmân tom, maid mun lam sust kuullâm.»

₂₇Sij iä iberdâm, et Jeesus sáárnui Eejist. ₂₈Nuuvtpa Jeesus joođhij: »Talle ko tij leppeđ aledâm Ulmuu Alge, tij ibbeerdvetteđ, et mun lam tot kote mun lam, jiemge mun poorgâ maiden jiečânân, pic sáárnum nuuvt ko Eeči lii muu máttááttâm. ₂₉Sun, kote vuolgâttij muu, lii muin. Sun ij lah kuáđđám muu ohtuu, tastko mun poorgâm puoh suu mielâ mield.»

₃₀Maaŋgah uskuu Jeesusân, ko kullii suu sárnumin näävt.

₃₁Toid juudalijd, kiäh tääl uskuu sunjin, Jeesus eeđâi: »Jis tij pisovetteđ oskolâžžân muu máttááttâsân, te tij leppeđ tuođâi muu máttááttâspárnááh. ₃₂Tij oppâvetteđ tubdâđ tuotâvuođâ, já tuotâvuotâ taha tii rijjân.» ₃₃Sij västidii sunjin: »Mij lep Áábráhâm maajeeldpuátteeh, ep mij lah kuássin lamaš kiängin uárjih. Maht tun talle puávtáh ettâđ, et mij šoddâp rijjân?» ₃₄Jeesus västidij: »Tuođâi, tuođâi: juáháš, kote suddod, lii sudo uárji. ₃₅Uárji ij piso táálust avalávt, mut alge piso. ₃₆Jis Alge taha tii rijjân, te tij leppeđ tuođâi-uv rijjâ. ₃₇Mun tiäđám kale, et tij leppeđ Áábráhâm maajeeldpuátteeh. Mut tij haalijdvetteđ koddeđ muu, tastko tij eppeđ tuhhit muu máttááttâs. ₃₈Mun sáárnum, maid lam Iäččán kulen uáinám – já tij porgâvetteđ, maid leppeđ jieijâd eejist oppâm.»

₃₉Sij västidii Jeesusân: »Mii eeči lii Abraham.» Jeesus eeđâi: »Jis tij liččijd Áábráhâm párnááh, te tij meiddei tovâččijd Áábráhâm tavoid. ₄₀Mut tääl tij haalijdvetteđ koddeđ muu – almaa, kote lii ettâm tijjân tuotâvuođâ, tom, maid sun lii Imelist kuullâm. Nuuvt ij lah Áábráhâm porgâm. ₄₁Tij porgâvetteđ aaibâs siämmáánáál ko iäččád.»

Sij ettii: »Mij ep lah šoddâm huáráástmist. Mist lii ohtâ eeči, Immeel.» ₄₂Taas Jeesus eeđâi: »Jis Immeel ličij tii eeči, tij rähističčijd muu, tastko mun lam vuálgám Imelist já puáđám suu kulen. Jiem mun jieš meridâm puáttiđ, pic sun vuolgâttij muu. ₄₃Mondiet tij eppeđ ibbeerd muu sárnum? Tondiet, et tij eppeđ killáá kuullâđ, maid mun eeđâm. ₄₄Tij leppeđ vuálgám Sátánist. Sun lii tii eeči, já tij haalijdvetteđ olášuttiđ suu haalu. Sáttán lii lamaš koddee aalgâ rääjist. Sun lii kukken tuotâvuođâst, tot lii sunjin oomâs. Ko sun kieleest, te sun tuođâi sárnu jieijâs mainâsijd, tastko sun lii kielesteijee já kiällás eeči. ₄₅Mut muu tij eppeđ osko, tastko mun eeđâm tijjân tuođâ. ₄₆Kotemuš tist puáhtá čäittiđ, et mun lam suddodâm? Jis mun sáárnum tuođâ, te mondiet tij talle eppeđ osko muu? ₄₇Tot, kote lii vuálgám Imelist, kulá, maid Immeel sárnu. Tij eppeđ kuulâ, tastko tij eppeđ lah vuálgám Imelist.»

₄₈Juudaliih ettii Jeesusân: »Amahân mij lep vuoigâdist ko ettâp, ete tun lah samarialâš já ete tust lii paas jieggâ?» ₄₉Jeesus västidij: »Ij must lah paas jieggâ. Mun kunnijâttám Iäččám, mut tij hiäpášitvetteđ muu. ₅₀Jiem mun koijâd jieččân kunnee, pic lii nubbe, kote koijâd já tyemmee. ₅₁Tuođâi, tuođâi: kote nuávdit muu máttááttâs, ij kuássin uáini jäämmim.»

₅₂Juudaliih ettii sunjin: »Tääl äšši lii čielgâs: tust lii paas jieggâ. Áábráhâm lii jáámmám, siämmáánáál profeteh-uv, mut tun eeđah: ’Kote nuávdit muu máttááttâs, ij kuássin kuáhtáá jäämmim.’ ₅₃Tun-uvks maka lah stuárráb ko iäččám Áábráhâm? Sun lii jáámmám, já nuuvt láá jáámmám meiddei profeteh. Kenen tun anah jieijâd?»

₅₄Jeesus västidij: »Jis mun jieš kirkesmitám kunnen, te tot kunnee ij lah mongin árvusâš. Mut muu kunnee kirkesmit Eeči, sun, kiäm tij koččoodvetteđ jieijâd Imelin. ₅₅Tij eppeđ lah oppâm tubdâđ suu, mut mun tuubdâm suu. Jis mun eđâččim, et jiem tuubdâ, te mun liččim kiälástâllee tego tij. Mut mun tuubdâm suu já toolâm suu sääni. ₅₆Tii eeči Áábráhâm ilodij tast, et uážuččij uáiniđ muu peeivi. Sun ooinij tom já ávudij.»

₅₇Juudaliih ettii sunjin: »Tun jieh lah vala vitlovgin já lah maka uáinám Áábráhâm!» ₅₈Jeesus västidij: »Tuođâi, tuođâi: jo ovdilgo Áábráhâm šoodâi – mun lijjim. ₅₉Talle sij nurâškuottii keeđgijd nuuvt et puohtii leggistiđ toiguin suu, mut Jeesus moonâi meddâl sii uáinusist já vuolgij temppâlist.