Johannes 6

₁Ton maŋa Jeesus vuolgij Galileajäävri ađai Tiberiajäävri tovnbel. ₂Stuorrâ aalmugjuávkku čuávui suu, tastko ulmuuh lijjii uáinám tobdostavoid, maid sun poorgâi ko pyeredij pyecceid. ₃Jeesus kuárŋui väriviältán já čokánij máttááttâspárnáidiskuin tohon. ₄Juudalij pessijâšjuhleh lijjii alda. ₅Jeesus pajedij kejâstuvâs já ooinij, et stuorrâ olmoošjuávkku lâi puátimin. Sun koijâdij Filippusist: »Kost mij puávtáččijm uástiđ leeibi, et sij uážuččii puurrâđ?» ₆Taam sun eeđâi Filippus keččâlâddâm tiet, tastko sun tieđij kale, maid porgâččij. ₇Filippus västidij: »Kyevtičyeđe deenaar leeibijn ij pijsááččii sijjân ubâ siemin pittáášgin jieškiäs-uv.» ₈Talle mottoom máttááttâspärni, Simon Piättár viljâ Andârâs, eeđâi Jeesusân: ₉»Tääbbin lii alge, kiäst láá vittâ ohraleeibi já kyehti kyele. Mut maht toh liččii tuárvi nyevt stuorrâ juávkun?»

₁₀Jeesus eeđâi: »Koččođ puohâid čokániđ.» Vieltijn šoodâi valjaas sino, já ulmuuh čokánii enâmân. Tobbeen lijjii suullân vittâtuhháát almajid. ₁₁Jeesus vaaldij leeibijd, kiijtij Immeel já juovij leeibijd toid, kiäh lijjii tiälláádâttâm purâdiđ. Siämmáánáál sun juovij kuolijd, já puohah ožžuu nuuvt ennuu ko halijdii. ₁₂Ko puohah lijjii kalanâm, Jeesus eeđâi máttááttâspárnáidis: »Nuurrâđ pasâttâssân pááccám pittáid, amas mihheen skemmâšuđ.» ₁₃Sij porgii nuuvt, já viiđâ ohraleeibist paccii vala pitáh kyehtnubáloh tievâ koorid, moh lijjii pááccám purâhánnáá.

₁₄Ko ulmuuh oinii, mon tobdostavo Jeesus poorgâi, sij ettii: »Taat lii tuođâi tot proofeet, kii koolgâi puáttiđ maailmân.» ₁₅Mut Jeesus tieđij, et ulmuuh aiguu viehârâš toohâđ sust kunâgâs, já tondiet sun kiäsádâđâi oppeet váárán. Sun moonâi tohon ohtuu.

₁₆Ko poođij eehid, máttááttâspárnááh monnii vuálus riidon, ₁₇lävkkejii kárbás já vuolgii Kapernaum kuuvl, nubebel jävrid. Lâi jo sevŋâd, ige Jeesus lamaš vala maccâm sii kuuvl. ₁₈Piegâi korrâsávt, já jäävri alne kirdii vielgis pááruh. ₁₉Ko sij lijjii suuhâm kyehtlovviiđâ teikâ kuulmâlov stadionmito verd, sij oinii Jeesus väzzimin jäävri páárui alne já aldanmin kárbá. Sij suorgânii. ₂₀Mut Jeesus eeđâi: »Mun täst lam, elleđ poolâ» ₂₁Sij aiguu väldiđ suu kárbás, mut siämmást käärbis jo poođij ton riidon, kuus sij lijjii monâmin.

₂₂Čuávuváá peeivi olmoošjuávkku lâi ain nubebeln jäävri. Ulmuuh lijjii uáinám, et tobbeen lâi lamaš ohtâ áinoo käärbis já et Jeesus ij lam lavkkim toos oovtâst máttááttâspárnáiguin pic sij lijjii vuálgám suuttáá. ₂₃Tiberiasist pottii kuittâg kárbáh alda ton saje, kost Hiärrá lâi kijttám Immeel já piemmâm aalmug. ₂₄Ko ulmuuh lijjii tääl uáinám, et Jeesus ij lamaš tobbeen iäge suu máttááttâspárnááhkin, sij lävkkejii kárbáid já vuolgii Kapernaumân uuccâđ Jeesus. ₂₅Sij kavnii Jeesus jäävri nubebeln já koijâdii sust: »Rabbi, kuás tun lah puáttám teehin?» ₂₆Jeesus västidij: »Tuođâi, tuođâi: eppeđ tij muu tondiet uusâ, et tij leppeđ uáinám tobdostavoid, pic tondiet, et tij finnijd leeibi já puurâid kalas. ₂₇Elleđ háputtâl láppojeijee, pic lappuuhánnáá purrâmâš, tom, mii addel nuvâhánnáá eellim. Tom tijjân addel Immeel Alge, tastko Eeči, Immeel jieš, lii merkkim suu seilâinis.» ₂₈Sij koijâdii: »Maid mij kolgâp porgâđ, vâi mii tavoh liččii Immeel tavoh?» ₂₉Jeesus västidij: »Oskođ sunjin, kiäm Immeel lii vuolgâttâm. Tot lii Immeel taho.»

₃₀Sij ettii Jeesusân: »Mon tobdostavo tun toovah, vâi mij tom uáinim maŋa oskop tunjin? Maid tun toovah? ₃₁Mii eejih purrii ävđinkuávlust mana, tego čalluin iättoo: ’Sun adelij almeest leeibi sijjân puurrâmnáál.’» ₃₂Taas Jeesus västidij: »Tuođâi, tuođâi: ij Mooses tijjân adelâm almeest leeibi, pic tuođâlii alme leeibi tijjân addel muu Eeči. ₃₃Immeel leibi lii tot, mii puátá almeest já addel maailmân eellim.»

₃₄Sij ettii: »Adde mijjân ain tom leeibi.» ₃₅Jeesus eeđâi: »Mun lam eellim leibi. Sun, kote puátá muu kuuvl, ij kuássin niälgu, já kote osko munjin, ij innig kuássin kuškâluu. ₃₆Mut tij, tego mun lam tijjân ettâm, leppeđ uáinám muu eppeđge kuittâg osko. ₃₇Puohah toh, kiäid Eeči munjin addel, puátih muu kuuvl, já tom, kote muu kuuvl puátá, mun jiem vuájálit meddâl. ₃₈Jiemhân mun lah puáttám almeest porgâđ muu jieččân táátu mield, pic tevdiđ jieččân vuolgâtteijee táátu. ₃₉Já muu vuolgâtteijee táttu lii, et mun jiem tipte oovtâgin toin, kiäm sun lii oskom muu haaldun, skemmâšuđ, pic majemuu peeivi mun cuuvnâm sii puoh. ₄₀Muu Eeči táttu, et juáhháást, kote uáiná Alge já osko sunjin, lii nuvâhánnáá eellim. Majemuu peeivi mun cuuvnâm suu.»

₄₁Juudaliih lijjii erdum tast, ko Jeesus eeđâi: »Mun lam tot leibi, kote lii puáttám vuálus almeest.» ₄₂Sij ettii: »Ij-uv taat lah Jeesus, Joovsep alge? Mij tiettip suu eeji já eeni. Maht sun puáhtá ettâđ, et sun lii puáttám vuálus almeest?» ₄₃Jeesus eeđâi taas: »Elleđ nimmâruš! ₄₄Ij kihheen pyevti puáttiđ muu kuuvl, jis ij Eeči, kote lii muu vuolgâttâm, kiäsut suu. Tom, kote muu kuuvl puátá, mun cuuvnâm majemuu peeivi. ₄₅Profetij čalluin iättoo: ’Sij puohah šaddeh Immeel máttááttâspärnin.’ Juáháš, kote lii kuldâlâm Eeji já váldám vuástá suu máttááttâs, puátá muu kuuvl. ₄₆Eeji ij kale kihheen lah uáinám; tuše sun, kote lii puáttám Immeel kulen, lii uáinám Eeji. ₄₇Tuođâi, tuođâi: tast, kote osko, lii nuvâhánnáá eellim. ₄₈Mun lam eellim leibi. ₄₉Tii eejih purrii ävđinenâmist mana, já liijká sij láá jáámmám. ₅₀Mut taat leibi puátá almeest, já tot, kote täst porá, ij jäämi. ₅₁Mun lam taat eellim leibi, kote lii puáttám almeest, já tot kote porá taan leeibist, iälá avalávt. Leibi, mon mun adelâm, lii muu ruumâš. Mun adelâm tom, vâi maailm uážuččij eelliđ.»

₅₂Täst šoodâi korrâ nágáttâllâm juudalij kooskâst. Sij koijâdii kyeimistis: »Maht tuot almai puávtáččij adeliđ jieijâs rummâš mijjân puurrâmnáál?» ₅₃Jeesus eeđâi sijjân: »Tuođâi, tuođâi: jis tij eppeđ puurâ Immeel Alge uážist já juuvâ suu voorâst, te tist ij lah eellim. ₅₄Mut tast, kote porá muu uáži já juhá muu voorâ, lii avalâš eellim, já majemuu peeivi mun cuuvnâm suu. ₅₅Muu uážži lii tuođâlâš purrâmâš, muu vorrâ lii tuođâlâš juhâmuš. ₅₆Kote porá muu uáži já juhá muu voorâ, piso must, já mun pisom sust. ₅₇Eeči, kote iälá, lii muu vuolgâttâm, já tego mun finniim elimân Eejist, siämmáá náálá tot, kote porá must, finnee eellim must. ₅₈Taat lii tot leibi, mii lii puáttám vuálus almeest. Tot lii eresmuđusâš ko tot purrâmâš, mon tii eejih purrii: sij láá jáámmám, mut tot, kote porá taan leeibist, iälá avalávt.»

₅₉Näävt Jeesus sáárnui ko sun máttááttij Kapernaum synagogast.

₆₀Ko suu máttááttâspárnááh taam kullii, te maaŋgâs sist ettii: »Taid saavâid ij kierdâ. Kii te puáhtá tyegárijd kuldâliđ?» ₆₁Jeesus tieđij, et máttááttâspárnááh erdâšuvvii suu saanij keežild, já sun eeđâi: »Šadda-uv tijjân hyenes mielâ taan tiet? ₆₂Maht kiävágin, jis tij uáinivetteđ Immeel Alge paijaanmin tohon, kost sun ovdil lâi! ₆₃Jieggâ ohtuu taha eellim, uážist ij lah mihheen aavhijd. Toh säänih, maid mun lam tijjân sárnum, láá jieggâ já eellim. ₆₄Tii kooskâst láá kuittâg motomeh, kiäh iä osko.» Jeesus uáináh tieđij aalgâ rääjist, kiäh iä oskom já kii suu kävildičij. ₆₅Sun joođhij: »Eidu tondiet mun ettim-uv tijjân, et kihheen ij pyevti puáttiđ muu kuuvl, jis Eeči ij tom sunjin suovâ.»

₆₆Maaŋgah Jeesus máttááttâspárnááh paccii taan maŋa juávhust iäge innig jottáám suu fáárust. ₆₇Jeesus koijâdij taan kyehtnubálovveest: »Áiguvetteđ-uv tij-uv vyelgiđ?» ₆₈Simmoon Piättár västidij sunjin: »Hiärrá, kiän kuuvl mij monâččijm? Tust láá nuvâhánnáá eellim säänih. ₆₉Mij oskop já tiettip, et tun lah Immeel Pase.» ₇₀Jeesus eeđâi sijjân: »Jiešhân mun tii väljejim, puoh kyehtnubáloh. Kuittâg ohtâ tist lii Sáttán.» ₇₁Sun uáivildij Juudas, Simmoon Iskariot alge. Sust šoodâi Jeesus kävildeijee, veik sun lâi ohtâ tain kyehtnubálov máttááttâspäärnist.