Johannes 19

₁Tääl Pilatus kočoi ruáiskuđ Jeesus. ₂Suáldátteh punnjii säggišaddoin ruuvnâ suu uáiván já kárvuttii suu purppurruopsis kiessâmmááccuhân. ₃Juáháš poođij vuáruttuvâi suu oovdân já eeđâi: Tiervâ tunjin, juudalij kunâgâs», já toškâlij suu muáđoid. ₄Pilatus moonâi vuod olgos já eeđâi juudalijd: »Mun puávtám suu teehin vâi čáitáččim, et jiem ane suu sujâlâžžân moossân.» ₅Nuuvt Jeesus poođij olgos, säggišaddoruvnâ uáivist já purppur ivnásâš kiessâmmááccuh pajalist, já Pilatus eeđâi: »Keejâ, olmooš!» ₆Ko ollâpaapah já suu almaah oinii Jeesus, sij čuárvuškuottii: »Riistânnavlii! Riistânnavlii!» Pilatus eeđâi sijjân: »Väldiđ tij suu já riistânnavliđ. Mun jiem lah huámmášâm, et sun ličij sujâlâš moossân. ₇Juudaliih västidii: »Mist láá jieččân laavah, já laavâ mield sun lii ánsášâm jäämmim, tastko sun tovâdât Immeel Pärnin.»

₈Ko Pilatus kuulâi taam, sun šoodâi ain eenâb liävuttemmin. ₉Sun moonâi maassâd palacân já koijâdij Jeesusist: »Kost tun lah puáttám?» Mut Jeesus ij västidâm sunjin. ₁₀Jieh-uv tun sáárnu, veik mun koijâdâm?» Pilatus eeđâi. »Jieh-uv tun tieđe, et must lii väldi lyeštiđ tuu rijjâ já väldi riistânnavliđ tuu? ₁₁Jeesus västidij: »Tust ij liččii muu kuáttá mihheen vaaldijd, jis tot ij liččii adelum paijeen. Tondiet lii stuárráb sujâlâš tot, kote lii luovâttâm muu tunjin.» ₁₂Täst ovdâskulij Pilatus keččâlij finniđ Jeesus rijjâ. Mut juudaliih čuorvuu: »Jis luáštáh suu rijjâ, tun jieh lah kiäisár ustev! Kote aaleed jieijâs kunâgâssân, paijaan kiäisár vuástá.» ₁₃Ko Pilatus kuulâi taam, sun puovtij Jeesus olgos já čokánij tuámmárstovlisis nuuvt kočodum Keđgišiiljon, mon hepreakielâ nommâ lii Gabbata. ₁₄Taat tábáhtui pessijái valmâštâspeeivi koskâpeeivi ääigi. Pilatus eeđâi juudalijd: »Taa lii tii kunâgâs.» ₁₅Juudaliih čuorvuu: »Meddâl» Meddâl! Riistânnavlii suu!» Pilatus eeđâi sijjân: »Koolgâm-uv mun riistânnavliđ tii kunâgâs?» Mut ollâpaapah västidii: »Ij mist lah kihheen eres kunâgâsâid ko kiäisár.» ₁₆Sii vátámâš keežild Pilatus tastoo luovâttij Jeesus riistânnavliimân.

Sij vuolgii tuálvuđ Jeesus. ₁₇Sun kuodij jieš riistâs já juuđij kaavpug ulguubel taggaar sajan, mii kočoduvvoo uáiviskálžusaijeen, hepreakielân Golgata. ₁₈Tobbeen suáldátteh riistânnävlejii Jeesus já siämmáá ääigi suin almaikuáhtá, oovtâ kuábbáá-uv pel, já Jeesus sunnuu kooskân. ₁₉Pilatus lâi čáállám taavlu, mii kiddejui riistân. Tast lijjii säänih: »Jeesus Nasaretlâš, juudalij kunâgâs.» ₂₀Maaŋgah juudaliih luhhii čalluu, tastko saje, kost Jeesus riistânnävlejui, lâi alda kaavpug. Tekstâ lâi čallum hepreakielân, läättinkielân já kreikakielân. ₂₁Juudalij ollâpaapah ettii Pilatusân: »Ele čääli: ’Juudalij kunâgâs.’ Čääli, et sun lii ettâm: ’Mun lam juudalij kunâgâs.’» ₂₂Pilatus västidij: »Maid mun čaallim, tom mun čaallim.» ₂₃Ko suáldátteh lijjii riistânnavlim Jeesus, sij valdii suu pihtâsijd ja juohhii taid neelji uásán, jieškođe-uv suáldáttân jieijâs uási. Sij valdii meiddei sävŋittes pääiđi, mii lâi paijeen vuálus siämmáš kuuđâlm, ₂₄já ettii kuáimásis: »Ep kiško tom. Vuárbádep, kii tom finnee.» Näävt olášui taat čalluu sääni:

»Sij juohhii koskânis muu pihtâsijd já vuárbádii muu mááccuh.

Eidu toin naalijn suáldátteh porgii. ₂₅Jeesus riistâ kulen čuožžuu suu enni já suu eeni uábbi sehe Máárjá, Klopas kálgu, já Magdala Máárjá. ₂₆Ko Jeesus ooinij, et suu enni já rákkásumos máttááttâspärni čuážžoin tast, sun eeđâi iännásis: »Nissoon, taat lii algaad!»

₂₇Talle sun eeđâi máttááttâspárnásis: »Taat lii iännád!» Ton puudâ rääjist máttááttâspärni oonij huolâ Jeesus eenist.

₂₈Jeesus tieđij, et puoh lâi tääl olášum. Vâi čaalâ olášuuččij, sun eeđâi: »Must lii koško.» ₂₉Tobbeen lâi litte tievâ suvreviinist. Suáldátteh njuoskâdii toos sape ja pajedii tom iisopruávu keejist Jeesus poksâmáid. ₃₀Jeesus juuvâi viinist já eeđâi: »Tot lii olášittum.» Sun kärŋilutij uáivis já adelij jiegâs.

₃₁Talle lâi valmâštâspeivi, iäge rummâšeh puáhtám pääcciđ hiäŋgáđ riistân sabattin, tastko taat älgee sabbaat lâi eromâš stuorrâ juhle. Juudaliih tattuu tondiet Pilatusist cuovkkiđ riistânnävlejum almai jyelgitaavtijd, nuuvt et rummâšijd puávtáččij väldiđ vuálus. ₃₂Nuuvtpa suáldátteh cyevkkejii jyelgitaavtijd toin almain, kiäh lijjii riistânnävlejum Jeesusáin, vistig nubbeest já tastmaŋa nubbeest. ₃₃Ko sij pottii Jeesus kuuvl, sij huámmášii, et taat lâi jo jáámmám, iäge sij tondiet cuovkkim suu jyelgitaavtijd. ₃₄Kiinii suáldáttijn kuittâg čuoggij sääiti suu ertpiälán, já häävi tállân voordij já tast kuulgâi čääci. ₃₅Tot, kote taam ooinij, lii tuođâštâm tast, vâi tij-uv oskoččijd. Suu tuođâštus lii lyetittettee, já sun tiätá, et sárnu tuođâ. ₃₆Näävt tábáhtui, vâi olášuuččij čalluu sääni: »Sust ij uážu cuovkkiđ oovtâgin täävti.» ₃₇Nube čallust vuod iättoo: »Sij keččih sunjin, kiäm láá eidu čuoggim.»

₃₈Taan maŋa mottoom Joovsep, kote lâi Arimatiast meddâl, táátui Pilatusist, et uážuččij väldiđ Jeesus rummâš riistâst. Sun lâi Jeesus máttááttâspärni, mut syele, tastko sun poolâi juudalijn. Pilatus mieđâi táttumân, já Joovsep poođij já vaaldij rummâš vuálus. ₃₉Ton sajan poođij meiddei Nikodemos, tot almai, kote vuosmustáá lâi iällám Jeesus kulen iho, já sust lijjii fáárust čyeti mittod mirha já aaloe siävuttâs. ₄₀Almaikyevtis valdijn Jeesus rummâš já kiesáin tom kiessâmlijnijd já piejáin fáárun njaalgâhaajâg vuoidâsijd, tego juudaliih läävejii ko sij hävdidii uámikkâsâidis. ₄₁Tobbeen, kost Jeesus riistânnävlejui, lâi muorâkärdi, já muorâkäärdist lâi uđđâ hävdi, moos ij lam vala hävdidum kihheen. ₄₂Sij pieijii Jeesus toos, tastko lâi juudalij juhle valmâštâspeivi já tot hävdi lâi alda.