Jeesus iärutiervuođah -rukkoos
1Taam sárnum maŋa Jeesus pajedij kejâstuvâs alme kulij já eeđâi:
»Eeči, puddâ lii puáttám. Kirkesmit Algaad, vâi Alge kirkesmitáččij tuu. 2Tun lah oskom puoh ulmuid suu vááldán, nuuvt et sun adeličij nuvâhánnáá eellim puohháid, kiäid tun lah sunjin oskom. 3Já nuvâhánnáá eellim lii tot, et sij tobdeh tuu, áinoo tuođâlii Immeel, já suu, kiäm tun lah vuolgâttâm, Jeesus Kristus. 4Mun lam kirkásmittám tuu tääbbin eennâm alne olášutmáin pargo, mon tun adelih munjin porgâđ. 5Eeči, kirkesmit tun tääl muu, vääldi muu jieijâd kuuvl já adde munjin tom kirkkâdvuođâ, mii must lâi tuu kulen jo ovdil ko maailm šoodâi.
6»Mun lam almottâm tuu noomâ taid ulmuid, kiäid tun väljejih maailmist já adelih munjin. Sij lijjii tuu, já tun uskuh sii munjin. Sij láá váldám tuu sääni jieijâs uámmin. 7Sij tietih tääl, et puoh, maid tun lah munjin adelâm, lii puáttám tust. 8Puoh tom, maid tun lah adelâm munjin sárnumnáál, mun lam sijjân sárnum, já sij láá váldám muu saanijd vuástá. Tääl sij tietih, et mun lam puáttám tuu kulen, já sij oskoh, et tun lah muu vuolgâttâm.
9»Mun ruhâdâlâm sii peeleest. Maailm peeleest mun jiem ruhâdâl, pic toi, kiäid tun lah munjin adelâm, tastko sij kuleh tunjin. 10Puoh, mii lii muu, lii tuu, já mii lii tuu, lii muu, já muu kirkkâdvuotâ tiättoo sist.
11»Mun jiem lah innig maailmist, mut sij pääcih maailmân, ko mun puáđám tuu kuuvl. Pase Eeči, suoijâl sii nommâd vuoimijn, ton noomâ, mon tun lah munjin adelâm, nuuvt et sij liččii ohtâ, tego muoi láán ohtâ. 12Ko mun lijjim siiguin, suojâlim sii nommâd vuoimijn, ton noomâ, mon tun lah munjin adelâm. Mun varjâlim sii, ige ohtâgin sist skemmâšum, pic tot, kote koolgâi karttâđ káđuttâsân, vâi čaalâ olášuuččij.
13»Tääl mun puáđám tuu kuuvl. Mun sáárnum taam, ko lam vala maailmist, nuuvt et muu ilo tiävdáččij sii. 14Mun lam almottâm sijjân sáánnád, já sij láá finnim maailm vaje jieijâs uássin, tastko sij iä kuulâ maailmân, tego mungin jiem kuulâ. 15Jiem kuittâg áánu, et váldáččih sii meddâl maailmist, pic et varjâliččih sii paast. 16Sij iä kuulâ maailmân, tego jiem mungin kuulâ. 17Passoot sii tuotâvuođâinâd. Tuu sääni lii tuotâvuotâ. 18Nuuvtko tun vuolgâttih muu maailmân, nuuvt lam mun-uv vuolgâttâm sii. 19Sii tiet mun pasottâm jieččân uhren, nuuvt et sij-uv pasottuuččii tuotâvuođâst.
20»Mun jiem ruhâdâl tuše sii peeleest, pic meiddei toi peeleest, kiäh sii tuođâštem tiet oskoh munjin. 21Mun ruhâdâlâm, et sij puohah liččii ohtâ, tego tun, Eeči, lah must já mun tust. Nuuvt kalgeh sij-uv leđe ohtâ miiguin, vâi maailm oskoččij, et tun lah muu vuolgâttâm.
22»Tom kirkkâdvuođâ, mon tun lah adelâm munjin, lam mun adelâm sijjân, vâi sij liččii ohtâ, tego mij lep ohtâ. 23Ko mun lam sist já tun lah must, sij láá tievâslávt ohtâ, ja talle maailm ibbeerd, et tun lah vuolgâttâm muu já et tun lah rähistâm sii nuuvtko tun lah rähistâm muu.
24»Eeči, mun táátum, et toh, kiäid tun lah munjin adelâm, liččii muin tobbeen kost mun lam. Tobbeen sij uáinih muu kirkkâdvuođâ, mon tun lah adelâm munjin, tastko tun lah rähistâm muu jo ovdil maailm sivnedem. 25Vanhurskes Eeči, maailm ij lah tuu tubdâm, mut mun tuubdâm, já taah, kiäh láá täst, láá šoddâm tiettiđ, et tun lah vuolgâttâm muu. 26Mun lam máttááttâm sii tubdâđ tuu noomâ já máttááttâm ain, vâi sist pisoččij siämmáš rähisvuotâ, maid tun lah munjin čáittám, já et mun näävt pisoččim sist.»
